Шығыстың бас қаласы Өскеменнен 450 шақырымдай қашықта жатқан шекара түбіндегі Марқакөл ауылынан облыс орталығына жолаушылар автобусы шықты. Бұл сапарды жергілікті тұрғындар көп жыл күтті, деп хабарлайды F16.kz.
Араға көп жыл салып алғашқы рейске шыққан жолаушылар автобусын аудан әкімі Рүстембек Кемешев, аудандық мәслихаттың төрағасы Мамырбек Қалелов және ауыл ақсақалдары арнайы шығарып салды. Қариялар ақ батасын беріп, әжелер шашу шашып, сәт сапар тіледі.
Аудан халқы үшін бұл — жай ғана көлік емес, үлкен үміт пен өркендеудің бастамасы. Қоғамдық көлік қатынасының жандануы – медицина, білім, сауда, туризм сияқты өмірдің барлық саласына оң әсер етпек. Жаңадан ашылған рейс ауыл тұрғындарының ғана емес, шалғайдағы өңірде туризмді дамытуға серпін бермек.
Фото: ШҚО өңірлік коммуникациялар қызметі
