Шығыстың ауыл-аймағын ауызсумен қамту мақсатында қолға алынған жобалар межелі мерзімнен кешеуілдеп жатыр. Бұл туралы облыстық энергетика және тұрғын үй-коммуналдық шаруашылық басқармасының басшысы Нұрлан Рамазанов мәлім етті, деп хабарлайды F16.kz.
Мемлекет басшысы Қасым-Жомарт Тоқаев 2025 жылдың соңына дейін Қазақстан халқын ауызсумен 100 пайыз қамту жөнінде міндет қойған. Президент тапсырмасына сәйкес Шығыс Қазақстан облысында ауқымды жұмыстар жалғасын тапты. Дегенмен мәселелер де жоқ емес. Айталық, Ұлан, Самар, Марқакөл, Глубокое аудандарында ауызсу құбырын тарту жұмысы мерзімнен кешеуілдеп тұр.
Солардың ішінде әсіресе Самар ауданының үш елді мекені – Құлынжон, Аққала және Көкжырада тартылған ауызсу құбырының мәселесі облыс әкімінің назарын аудартты. Аудан басшылығы жобаны жыл соңына дейін толық аяқтауға уәде берді.
Бюджеттен 309 млн теңге бөлінді. Конкурс өткізіп жатырмыз. Бір өкініштісі, бұл нысандар проблемалық болғандықтан сумен қамтамасыз етумен айналысатын кәсіпорындар конкурсқа қатысқысы келмейді. Дегенмен жуықта тағы екінші рет конкурс жарияладық, үш қатысушы анықталды. Қайсысы жеңіп алады, солармен жұмыс істейміз. Жобаны биылғы қарашаға дейін аяқтаймыз, – деді Самар ауданының әкімі Серік Жеңісов.
Өңір басшысы Нұрымбет Сақтағанов тұрғындарды ауызсумен қамту мәселесі Президент жүктеген маңызды міндеттердің бірі екенін және оған аса мұқият қарау қажеттігін ескертті.
Мемлекет басшысының жыл соңына дейін халықты 100 пайыз ауызсумен қамтамасыз ету жөніндегі тапсырмасы толық орындалуға тиіс. Қатаң бақылауға алыңыз. Басыңызбен жауап бересіз! – деді аймақ басшысы.
