Бүгін таң атысымен қала тұрғындары мен қонақтары табиғи таза өнімдер сатып алу үшін “Алтай” көтерме -тарату орталығына асықты. Онда бүгін «Туған жер – алтын бесігім» жобасы аясында Катонқарағай ауданының ауылшаруашылық жәрмеңкесі өтті, деп хабарлайды F16.kz.
Өскемендіктер біраздан бері сенбілік таңды жәрмеңкемен атыруды әдетке айналдырған. Бүгін де жергілікті кәсіпкерлерден табиғи, таза өнім сатып алуға жиналғандардың қарасы қалың.
Бүгін ауылдық округтер белсене қатысып жатыр. Жалпы жәрмеңке сөрелеріне 2 тонна жылқы еті, 1,5 тонна сиыр еті, 500 май, сүт, қымыз, ірімшік, құрт пен көкөністер қойылды. Нарықтағы бағадан төмен сатып жатырмыз. Өскеменде сиыр еті 3600 теңге болса, бүгін 3300 теңгеден сатылды, — деді Катонқарағай ауданы әкімінің орынбасары Әли Сапенов.
Жәрмеңке қонақтарына палау, ыстық бауырсақ тегін таратылып, көпшіліктің көңілін көтеру үшін концерттік бағдарлама да дайындалған.
Қала тұрғындарына да, өнім өндірушілерге де қолайлы деп ойлаймын. Бүгін кісі өте көп. Өзіміз ет алу үшін келдік. Жәрмеңке болатынын бұған дейін естіп жүргенмін, бүгін бірніші рет келіп тұрмын. Қажетті заттарыңды бір жерден тауып, арзан бағада алуға болады. Осындай жәрмеңкелер жиі ұйымдастырылса нарықтағы баға да төмендейтін еді, — дейді қала тұрғыны Гаухар Қожамжарова.
Бүгінгі ауылшаруашылық жәрмеңкесінде жылқы еті 3100 теңге, сиыр еті 3300 теңгеге бағаланыпты. Сонымен қатар жеміс-жидек пен көкөністер тағы бар. Айта кетейік, жыл басынан бері Шығыста 425-ке жуық жәрмеңке ұйымдастырылған.
