Оралхан Бөкей атындағы кітапханада «Кітапхана – егде жастағы адамдарды зияткерлік дамыту орталығы» атты жаңа жоба бастау алды. Жоба аясында зейнеткерлер түрлі замануаи үйірмелерге қатысып, тіл үйрене алады, деп хабарлайды F16.kz.
30 қыркүйек күні сағат 10.00-де Халықаралық Қарттар күніне орай аталмыш кітапханада жобаны таныстыру шарасы өтеді.
Жаңа жоба аясында егде жастағы қала тұрғындары «Менің смартфоным» үйірмесіне, «Жасанды Интеллекті пайдалану» дәрістері мен казақ, түрік, ағылшын, француз тілін үйрету курстарына тегін қатыса алады.
Жобаның негізгі мақсаты — зейнеткерлерді жаңашылдыққа бейімдеу. Технологияны әлеуметтік тұрмыстық қажеттіліктерге пайдалану арқылы жан-жақты дамуға ықпал ету. Мәселен, қатырма қағаздан 3D бейнелерді жасап, саналарын сергітетін «Паперкрафт» клубы жұмыс бар немесе оқыған кітаптарын талқылап, рухани демалатын «Көңілді кештер» кездесулері ұйымдастырылады, — дейді кітапхана қызметкерлері.
Одан бөлек, қажетті заттардың тізімін жасап, дәрісін қабылдау уақытын еске салу үшін және тұрмыстық жағдайларға көмектесетін жасанды интеллекті меңгеруге де мүмкіндік бар. Айта кету керек, шаралардың барлығы заманауи гаджеттермен жұмыс істеп, қосымшалар арқылы дәрігерге жазылу, дәрі-дәрмекке тапсырыс беру, театр мен концерттерге, пойызға, ұшаққа билет алу және басқа да қажеттіліктер үйретуге бағытталады.
