Өскеменге 20 жаңа автобус әкелінді. Енді қала тұрғындары ақ түсті, қаланың логотипі бар автобуспен қатынайды.
Автобустардың сыйымдылығы – 100 адам. 26 отыратын орын, сондай-ақ мүмкіндігі шектеулі азаматтарға арналған пандус бар. Қоғамдық көліктер Саран қаласында құрастырылған, дизельді, қосымша фильтрация жүйесімен жабдықталған. Жаңа автобустарды қала әкімі Алмат Ақышов қарап шықты.
— Тасымалдау көліктерін ауыстыру бойынша облыс әкімінің тапсырмасын орындау мақсатында жаңарту жүргізіп жатырмыз. Бүгін «РОСТ» көлік компаниясы 20 жаңа автобус алып келді. Жолаушыларды тасымалдау мәселесі біздің қаламызда өзекті. Автобустарды аралап көрдік, сапасы жақсы. Енді барлығы халықтың игілігіне қызмет ететін болады, – дейді қала әкімі.
Жаңа автобустар негізгі, ең сұранысқа ие бағыттарға қойылады. Алдағы уақытта тағы 20 автобус пен 12 электробус сатып алу жоспарланған.
