Үлкен Нарын ауданында әлеуметтік және инженерлік инфрақұрылымды дамытуға бағытталған бірқатар маңызды жоба жүзеге асырылмақ. Бұл туралы Өңірлік коммуникациялар қызметінде өткен брифинг барысында Үлкен Нарын ауданының әкімі Елдос Байрахметов мәлім етті, деп хабарлайды F16.kz.
ТУРИСТЕР САНЫ ЕСЕЛЕП АРТҚАН
Үлкен Нарын ауылында жергілікті бюджет есебінен атшабар салу, сондай-ақ аудан орталығы мен Жұлдыз ауылында ұялы байланыс желісінің сапасын арттыру мақсатында антенна-мачта құрылғыларын орнату бойынша жобалық-сметалық құжаттама әзірленіп жатыр. Сонымен қатар, Үлкен Нарын ауылындағы Абылайхан көшесінің жолына күрделі жөндеу жүргізу де жоспарға енгізілген.
Аймақтың туристік әлеуеті жылдан жылға артып келеді. 2025 жылы ауданға 15 050 турист келіп, бұл көрсеткіш өткен жылмен салыстырғанда 165% өскен. Туристік инфрақұрылымды дамыту мақсатында «ҚазАвтоЖол» компаниясымен бірлесе заманауи жол бойы сервис павильоны пайдалануға берілді.
Болашақта Свинчатка ауылында демалыс базасы салынбақ. Бұл жаңа жұмыс орындарының ашылуына, сондай-ақ ауданның инвестициялық тартымдылығын арттыруға сеп болады. Мұндай жобалар өңірдің жол бойы туризмін жандандырып, шағын бизнестің дамуына серпін береді.
АУЫЗСУ МӘСЕЛЕСІ ЕРЕКШЕ НАЗАРДА
Аудан әкімдігі жұмысының басым бағыттарының бірі – халықты сапалы ауызсумен қамтамасыз ету. Бүгінде «Үлкен Нарын ауылындағы су құбыры нысандарын және желілерін қайта жаңарту» жобасы аясында ұзындығы 77,4 шақырым болатын су жүйелеріне жөндеу жұмыстары жүргізілуде. Осындай жұмыстар Алтынбел, Үштөбе және Солдатово ауылдарында да атқарылып жатыр.
– Су жүйелерін жаңғырту – тұрғындардың өмір сапасын жақсартып қана қоймай, ауданның тұрақты дамуына да жол ашады. 2025 жылы Үлкен Нарын ауылында 10 көшеге орташа жөндеу жүргізіліп, жолдар, көпірлер мен су өткізу құрылыстары ретке келтірілді, – деп хабарлайды Өңірлік коммуникациялар қызметінен.
