Қазақстанда ауылдық өңірлердің тұрғындары үшін медициналық көмектің қолжетімділігі мен сапасын арттыруға бағытталған «Ауылдық денсаулық сақтауды жаңғырту» ұлттық жобасын іске асыру жалғасуда, деп хабарлайды F16.kz тілшісі Денсаулық сақтау министрлігіне сілтеме жасап.
Жоба Мемлекет басшысының тапсырмасына сәйкес іске асырылуда және үш негізгі бағытты көздейді:
- ауылдық елді мекендерді медициналық-санитариялық алғашқы көмек (МСАК)ұйымдарымен қамтамасыз ету;
- ауыл тұрғындарына шұғыл көмек көрсету;
- ауылдық денсаулық сақтау нысандарының кадрлық әлеуетін нығайту.
Жобаның шеңберінде 655 медициналық-санитариялық алғашқы көмек нысаны – медициналық пункттер, фельдшерлік-акушерлік пункттер мен дәрігерлік амбулаториялар салу көзделген. Қазіргі уақытта сол 655 нысанның 596-ның құрылысы аяқталды, оның ішінде:
- 387 нысан ескірген ғимараттардың орнына салынған;
- 209 нысан бұрын медициналық инфрақұрылымы болмаған елді мекендерде тұрғызылды.
Дерек көзінің хабарлауынша, қалған 59 нысанды ағымдағы жылдың соңына дейін пайдалануға беру жоспарланып отыр.
Сонымен қатар, жоба аясында 32 аудандық орталық аурухананы жаңғырту, ауылдық өңірлер үшін 1 100-ден астам медицина қызметкерлерін даярлау сияқты міндеттерді орындау көзделген.
– Ауылдық денсаулық сақтауды жаңғырту жобасы соңғы кезеңге шықты. Алдағы айларда Қазақстанның ауыл тұрғындары жаңа заманауи медициналық нысандарға қол жеткізе алады, бұл медициналық көмектің сапасы мен қолжетімділігін айтарлықтай арттырады, – деп мәлім етті ҚР Денсаулық сақтау министрлігінен.
