Өскемен – Алтай – Катонқарағай – Рахман қайнары жолының бойында тау жыныстары опырылып құлап, көлік қозғалысын бөгеп қалды. Осы жағдайдан кейін республикалық маңызы бар жолдардың таулы учаскелеріне визуалды тексеру жүргізілетін болды, деп хабарлайды F16.kz.
Таскөшкін жолдың 25-шақырымында болған. Мамандар тау жыныстарының опырылуына толассыз жуған жауын-шашын себеп болуы мүмкін екенін айтты.
Осы жағдайдан кейін әлеуметтік желілерде қызу талқы басталды. Оқиға болған жерде адамдар көліктерді тоқтатып, жолды бөгеп қалған ұсақ тастарды бірлесіп өз бетінше тазалай бастаған. Алайда жол саласына жауапты мекеме басшылығы бұл әрекетті құптамады.
«Егер жолда тас құлағанын байқасаңыз, қауіпсіз қашықтықта тоқтап, тәулік бойы жұмыс істейтін 1403 байланыс орталығына хабарласып, жағдайды мәлімдеңіз. Жалпы, тасжолдарда патрульдік бақылау тұрақты жүргізіледі. Жүргізушілерге көліктен шықпауға, жолды өз бетінше тазалауға әрекет жасамауға кеңес береміз. Өйткені кез келген сәтте тас қайта құлауы мүмкін. Қазір қауіпті таулы беткейлердің барлығына визуалды тексеру жүргізуді жоспарлап отырмыз», — деді «ҚазАвтоЖол» ҰК» АҚ ШҚО филиалының директоры Нұрбек Темірханов.




