Сәтбаев даңғылы мен Жібек жолы көшесінің қиылысында шеңбер жолдың бір бөлігі не себепті уақытша жабылды? Үлкен жолайрық қашан толық ашылады? Облыстық жолаушылар көлігі және автомобиль жолдары басқармасының өндірістік-техникалық бөлімінің басшысы Гүлдана Ермекова осы сұрақтарға жауап берді, деп хабарлайды F16.kz.
Маманның айтуынша, жол құрылыс жұмыстары толық аяқталмай тұрып қала тұрғындарының өтініші бойынша ашылған. Енді жолайрыққа деформациялық жіктер орнату қажет. Бұл жұмыстарды жүргізу үшін алдымен жолдың бір жағы, кейін екінші жағы кезек-кезек жабылады.
Деформациялық жіктер Еуропадан тапсырыспен жеткізілуі тиіс. Алайда жіктерді дайындау, тасымалдау және кедендік рәсімдерден өткізу кезінде кідіріс болған көрінеді.
Басқарма өкілдерінің түсіндіруінше, жол бөлігі бұрынғы құрылыс жұмыстары кезіндегі кемшіліктерді түзету үшін жабылмаған, бұл алдын ала жоспарланған іс.
Дәл қазір өткел жолда көліктер сағатына 40 шақырымнан, ал айналма жолда 30 шақырымнан аспайтын жылдамдықпен қатынайды.
2027 жылы Есенберлин даңғылы бағытындағы жоғарғы жол бөлігін толық аяқтап, асфальттың соңғы қабатын төсеу жоспарланып отыр. Осы жұмыстардан кейін ғана тротуарлар салынып, жаяу жүргіншілер өткелдері салынып, жарықтандыру жүйесі орнатылады.




