Еңбек және халықты әлеуметтік қорғау министрлігі Мемлекеттік еңбек инспекциясы комитетінің Шығыс Қазақстан облысындағы департаментінің басшысы Бақытбек Қизатов «Мемлекеттік қызмет ардагері» төсбелгісімен марапатталды, деп хабарлайды F16.kz.
ҚР Мемлекеттік қызмет істері агенттігінің төрағасы қол қойған марапатты Бақытбек Қизатовқа Шығыс Қазақстан облысының әкімі табыстады.
«Бұл марапат Бақытбек Құрманбекұлы мемлекеттік қызметтегі көп жылғы адал еңбегінің, кәсібилігінің және мемлекеттік қызметті дамытуға қосқан елеулі үлесінің бағасы», — деп жазды облыс әкімдігінің телеграмдағы ресми арнасы.
Бақытбек Құрманбекұлы мемлекеттік қызметтегі еңбек жолын 1996 жылы бастаған. Жиырма жылдан астам уақыт еңбек және халықты әлеуметтік қорғау саласындағы өңірлік құрылымдарға басшылық етті. Тәжірибелі маман еңбек жолында ол республикалық және халықаралық деңгейде бірнеше рет жоғары бағаланған. Екі мәрте Қазақстанның үздік мемлекеттік еңбек инспекторы атанып, ТМД елдері арасындағы үздік еңбек инспекторы болып танылды. «Әлеуметтік қорғау саласының үздігі» атағына ие. 2023 жылы «Құрмет» орденімен марапатталған.
Бақытбек Қизатовты лайықты марапатымен құттықтаған аймақ басшысы Нұрымбет Сақтағанов оның талай жылдық тәжірибесі мен жұмысына деген жауапкершілігін ерекше атап өтті.




