Әр жұманың кешінде облыстық филармонияның үлкен залына халық лық толады. Бүгін мұнда «Туған жер – алтын бесігім» жобасы аясында Ұлан ауданының мәдени күндері өтіп жатыр, деп хабарлайды F16.kz.
Жиылған жұртшылықпен бірге облыс әкімі Нұрымбет Сақтағанов алдымен фойеге қойылған қолөнер көрмесін тамашалап, Ұлан ауданында өндірілетін өнімдер мен ұлттық тағамдардан дәм татты.
Сондай-ақ жыл сайын әлемнің әр түкпірінен бүркітшілердің басын қосатын «Шығыс салбурыны» фестиваліне арналған әсерлі фотокөрме де көптің көңілінен шықты.
Биыл Ұлан ауданының ғана емес Шығыстың брендіне айналып кеткен халықаралық “Шығыс салбурыны” фестиваліне 5 жыл толды. Мәдени күндер аясында осы ерекше шараға басымдық беру дұрыс деп шештік. Жергілікті фотографтардың туындысын жинақтап, көрме ұйымдастырдық, — деді Ұлан ауданы әкімінің орынбасары Маделхан Піржанов.
Артынша «Ұлы мекен – туған елім» атты Ұлан ауданы өнерпаздарының концерті басталды. Кеш қонақтары — Қазақстан Республикасының еңбек сіңірген қайраткері Естай Мұқашев, елге танымал әншілер Руфат Маратұлы мен Нұргүл Мыңғатова өз өнерлерін паш етті. Бұдан бөлек ұландық өнерпаздар да әуелетіп ән айтып, би билеп, көрініс қойып өскемендіктер мен қала қонақтарын бір серпілтті.
Айта кетейік, ертең таңғы сағат 8.00-ден бастап «Алтай» көтерме-тарату орталығы аумағында ауданның ауыл шаруашылығы өнімдерінің жәрмеңкесі өтеді. Онда халыққа ауылдан келген таза өнімдер қолжетімді бағада сатылады.
