Облыстық филармонияның үлкен залында Зайсан өнерпаздарының гала-концерті өтті, деп хабарлайды F16.kz.
Аталмыш мерекелік шара «Туған жер – алтын бесігім» жобасы аясында өткізілді.
Облыс орталығының тұрғындары мен қонақтарына арналған бағдарлама түрлі тақырыпты қамтып, мазмұны жағынан ауқымды болды. Мерекелік концерт қойылып, Зайсан ауданының мәдениеті мен білім саласынан сыр шертетін көрме ұйымдастырылды. Келушілер Зайсанда дайындалған өнімдерден дәм татып, түрлі бұйымдарды тамашалады.
Бұл кештің мақсаты – қала тұрғындары мен қонақтарын Зайсан ауданының тыныс-тіршілігімен, мәдениетімен таныстыру. Концертте өнерпаздар мен шығармашылық ұжымдары ән мен биден шашу шашып, кәсіпкерлер өз өнімдерін таныстырды. Мәдени күндер аясында, дәстүрлі сенбілік жәрмеңке және Maxi Mall сауда орталығында тағы бір мәдени шара өткізу жоспарда бар, – деді аудан әкімінің орынбасары Ермек Қорабаев.
Кешке жиналған көрерменнің қарасы қалың. Әсіресе, зейнеткерлер мен Зайсанның байырғы тұрғындары мен студенттер келгенін аңғару қиын емес.
Зайсан ауданының тумасымын, қазір Өскеменде университет қабырғасында оқып жатырмын. Туған жерін сағынған әр адам бүгінгі кештен ерекше әсер алады деп ойлаймын. Біз бүгін туыстарымызбен жерлестерімізге қолдау көрсету үшін арнайы келдік, — дейді Айсұлу Бердібекова.
Концерт шымылдығы Ұлы Абайдың өлеңдерімен түріліп, артынша аудан өнерпаздары халық әндері мен би қойылымдарын орындады. Туған өлкенің дәстүрі мен рухын ерекше ілтипатпен жеткізді.
