Су ресурстарын реттеу, қорғау және пайдалану комитетінің Ертіс бассейндік су инспекциясы мемлекеттік бақылау шеңберінде заңсыз салынған нысандар үшін алты субъектіні әкімшілік жауапкершілікке тартты, деп хабарлайды F16.kz.
Су ресурстары және ирригация министрлігі таратқан ақпаратқа сенсек, соттың бірінші инстанциясының шешімімен аталмыш нысандарды жою туралы шешім шығарылды. Оның ішіндегі 8-і Абай облысында, 4-еуі Шығыс Қазақстан облысында, 1-еуі Павлодар облысында орналасқан. Сонымен қатар құқық бұзушыларға жалпы сомасы 9 338 501 теңге көлемінде айыппұл салынды.
– Ертіс бассейндік су инспекциясының мамандары су қорын қорғау және пайдалану саласындағы заңбұзушылықтарды анықтап, жолын кесу бойынша жүйелі жұмыс жүргізіп келеді. Жаңа Су кодексіне енгізілген мемлекеттік бақылау саласындағы жаңа өкілеттіктер инспекторларға азаматтардың өтініштері мен су заңнамасын бұзу фактілеріне жедел әрекет етуге мүмкіндік береді, – деді Ертіс бассейндік су инспекциясының басшысы Медет Жәдігерұлы.
