Өскемендегі Maxi Mall сауда-ойын-сауық кешенінде «Халық заңгері» республикалық акциясы аясында ерекше іс-шара өтті. Бүгін облыс орталығының тұрғындары және қала қонақтары прокуратура мен әділет органдары, полиция мен сот орындаушылар сияқты мамандармен бетпе-бет жүздесіп, өздерін толғандырған сұрақтарды қоя алды, деп хабарлайды F16.kz.
«Халық заңгері» – Қазақстанның барлық қаласы мен ірі елді мекендерінде өткізілетін республикалық акция. Іс-шара аясында еліміздегі мемлекеттік органдардың өкілдері, заңгерлер мен адвокаттар тұрғындарды қабылдап, тегін заң көмегін көрсетеді.
Акцияның мақсаты – халықтың құқықтық сауаттылығын арттыру, өзекті мәселелерді шешу және тегін заң көмегін көрсету. Кез келген азамат келіп, мемлекеттік органдардан және елдің заң қоғамдастығының үздік өкілдерінен қажетті құқықтық көмек ала алады. Олардың арасында белгілі адвокаттар, заңгерлер, нотариустар, судьялар, прокурорлар, тергеушілер, сот орындаушылары, полиция қызметкерлері, әкімдік өкілдері, Әділет, салық органдары, жылжымайтын мүлікті тіркеу басқармасы сияқты басқа да мекемелердің мамандары бар. Бұл туралы ШҚО прокуратурасы 3-ші басқармасының бастығы Жандос Қоңыров айтты.
– Елімізде «Халық заңгері» акциясы осымен 10-шы жыл қатарынан өткізілуде. Бастапқыда акцияға заңгерлер мен адвокаттар ғана қатысатын. Бірақ уақыт өте келе іс-шараның мән-мағынасы, мәртебесі артып, акцияға Бас прокуратураның, әкімдіктердің, Әділет министрлігінің өкілдері, жеке сот орындаушылары, нотаруистар, медиаторлар мен басқа да мамандар қосылды, – дейді Жандос Қоңыров.
Оның айтуынша, 2016-2025 жылдар аралығында акцияға 10 мыңнан астам үздік сарапшылар мен шешім қабылдайтын мемлекеттік органдардың өкілдері қатысты. Құқықтық көмекке жүгінген 400 мыңнан астам адам кеңес алды.
Іс-шараның басы-қасында жүргендердің айтуынша, «Халық заңгері» акциясы басталған сәттен-ақ өз қажеттілігін, өзектілігін көрсеткен. Бұл акцияға халық та үйренген. Жыл сайын осындай іс-шараларға келіп, көкейінде жүрген сауалдарды қойып, оларға тұшымды жауап ала алады.
Бүгін де келушілер қарасы аз болған жоқ. Маман көмегіне жүгінушілердің бірін медициналық көмек мәселесі толғандырса, енді бірі жер учаскесіне қатысты туындаған проблемамен келген екен. Әлеуметтік көмек, еңбек құқығы, бизнесті қорғау, қылмыстық заңнама, балалар мен отбасы құқығын қорғау сияқты мәселелер де жиі көтеріледі екен.
– Бұл жерде жұмысты екі бағытта жүргіземіз. Біріншісі, әрине, заң нормаларын түсіндіру болса, екіншісі, кездесулерде бізге келіп түскен арыз-шағымдар бойынша жұмыс жүргізіп, мәселелерді заңмен көзделген уақыт аясында қарастырып, шешім қабылдап, арызгерлерге жауап беру. Біз қордаланған бірде-бір мәселені назардан тыс қалдырмауға тырысамыз. Бүгінгі акцияның мақсаты да осы, – дейді Ж.Қоңыров.
