Автомобиль көлігі және көліктік бақылау комитеті әкімшілік полиция комитетімен бірге Бас көлік прокуратурасының ұйымдастыруымен еліміз бойынша «Тасымалдаушы» деп аталатын ауқымды рейдтік іс-шара өткізді, деп хабарлайды F16.kz тілшісі Көлік министрлігіне сілтеме жасап.
– Басты мақсат – жолаушылардың қауіпсіздігін қамтамасыз ету және жол-көлік оқиғаларының алдын алу, – деп жазады дерек көзі.
Акция нәтижесінде 13,6 мыңнан астам жол ережесін бұзу дерегі анықталды, оның ішінде:
- 1 167 – жолаушылар мен жүкті тасымалдау ережелерін бұзу;
- 394 – жолаушылар мен жүкті заңсыз тасымалдау фактілері (көбіне такси жүргізушілері);
- 1 962 – техникалық байқаудан өтпеген немесе техникалық талаптарға сәйкес келмейтін көлік құралдары.
Белгілі болғандай, құқық қорғау органдарының мамандары оң рульді көліктерді тексеруге (Toyota Alphard, Estima және т.б.) ерекше назар аударған. Рейд барысында 213 қарсы бағыттағы жолаққа шығу дерегі тіркелді. Сондай-ақ, такси жүргізушілерінің бір тәулікте 5-6 аралық рейс орындау жағдайлары жиі кездеседі екен. Бұл – еңбек және демалыс режимін бұзу болып саналады.
– Жүргізушінің шаршаған күйінде көлік басқаруы – мас күйде көлік жүргізумен тең қауіп тудырады, – деп атап өтті Автомобиль көлігі және көліктік бақылау комитетінің қызметкерлері.
Тексеріс барысында 268 жүргізуші көлікті мас күйінде басқарса, 2 506 жүргізуші көлік басқарған кезде ұялы телефон қолданғаны белгілі болды.
– Автомобиль көлігі және көліктік бақылау комитеті тасымалдаушыларды заң талаптарын қатаң сақтауға, көлік құралдарының техникалық жарамдылығы мен жолаушылардың қауіпсіздігін қамтамасыз етуге шақырады. Профилактикалық шаралар жалғасын табады, – деп жазады Көлік министрлігінің баспасөз қызметі.
