11 қыркүйек күні, яғни ертең облыс орталығындағы Арбат алаңында «Shygys Book Fest – 2026» кітап фестивалі өтеді, деп хабарлайды F16.kz.
Шараның негізгі мақсаты – Мемлекет басшысы Қасым-Жомарт Тоқаев ұсынып отырған «Кітап оқитын ұлт» идеясын қолдау, кітап оқуды насихаттау, жерлес қаламгерлерге, талантты жастарға қолдау білдіру, олардың шығармаларын халыққа ұсыну, баспагерлерге қолдау көрсету.
Фестиваль барысында келушілер кітапты тек тамашалап қана қоймай, әдеби шығармаларды тануға, өз білімін сынауға, авторлармен жүздесуге, жаңа кітаптармен жақынырақ танысуға мүмкіндік алады.
Сондай-ақ оқырманға танымал бірқатар баспалар қатысады деп жоспарланған. Соның ішінде:
«Отбасы Хрестоматиясы» баспасы — отбасы құндылығы, бала тәрбиесі, өмірдің мәні, философия, қазақы аңыз-қиссалар және тұлғатану бағытындағы кітаптары болады.
«Қасым» баспасы — әдеби-тарихи құндылығы мол, қазақтың классик жазушыларының көптеген шығармаларын, сондай-ақ үлкен буын мен жастарға арналған түрлі кітаптарды ұсынады.
Сонымен қатар Мейірбаев Есенбек Айтқазыұлының демеушілігімен жарық көрген «Қабанбай» кітабының кітабының тұсаукесері өтеді.
Келушілерді ауқымды мәдени бағдарлама, жазушылармен және танымал тұлғалармен кездесулер, автограф-сессия, кітап жәрмеңкесі, буккроссинг, тақырыптық кітап көрмелері, жаңа басылымдардың тұсаукесерелері, арт-кеңістік, интеллектуальды сайыстар мен сыйлықтар, шығармашылық мастер-класстар, интерактивті ойын зоналары тағы басқа қызықтар күтеді.
Шара 14.00-19.00 аралығында Арбатта өтеді.
