Өскемендегі рұқсатсыз қоқыс полигоны: экологтар бір апта уақыт берді
Бүгін, 2 сәуірде Өскеменнің Бажов көшесі мен саяжайлар арасындағы жазықта тау болып үйілген қоқысты қала тұрғындарының бірі бейнетаспаға түсіріп, әлеуметтік желіге жариялада. Бұл оқиғаға байланысты Шығыс Қазақстан облысының экология департаменті мен табиғат қорғау полициясының мамандары жедел тексеру жүргізді, деп хабарлайды F16.kz.
МӘСЕЛЕНІҢ МӘН-ЖАЙЫ
«Бұл Бажов көшесі мен саяжайлар арасындағы бос жатқан жер. Бұрын жазық алқап еді, қазір не екені белгісіз. Биыл қыстай қаладан шығарылған қарды осында әкеліп төккен. Оған рұқсат етілді ме, жоқ па, көз жеткізе алмадым. Қар еріп кетті, сөйтсек қармен бірге мұнда қоқыс та шығарылған екен. Бұл дұрыс па? Бүкіл елде «Таза Қазақстан» жүріп жатыр, ал бізде…» деп жазды қала ішіндегі қоқысты бейнежазбаға түсірген тұрғын.
ҚҰЗЫРЛЫ ОРЫНДАРДЫҢ ЖЕДЕЛ ӘРЕКЕТІ
Әлеуметтік желілерде қоқыс туралы бейнежазба жарық көрген соң Шығыс Қазақстан экология департаментінің және табиғат қорғау полициясының мамандары оқиға орнына жедел аттанды. Тексеру барысында желіде жарияланған ақпарат расталды.
Қазір жағдай ведомство мамандарының бақылауында. Рұқсат етілмеген қоқыс үйінділерін анықтау және жою жұмыстары елдегі экологиялық жағдайды жақсартуға бағытталған «Таза Қазақстан» акциясының аясында жүргізіледі. Мамандар бұл бағытта белсенді жұмыс істеп жатыр.
Департамент өкілдері қала тұрғындарын және кәсіпорындарды қоршаған ортаны қорғау мәселесіне жауапкершілікпен қарауға шақырды.
Фото: видеодан алынған кадр
