Биылғы 1 сәуірден бастап Шығыстың бас қаласындағы бүкіл қоғамдық көлікте ONAY жүйесі іске қосылуға тиіс болған. Бірақ электронды төлем жүйесі әлі қолланысқа берілген жоқ. Мәселенің мән-жайын F16.kz тілшісі анықтауға тырысты.
Бұған дейін Өскемен қаласының әкімдігі осы жылдың 1 сәуірінен бастап барлық қоғамдық көлік жол ақысын төлеудің жаңа электронды жүйесіне көшірілетінін мәлім еткен. Бірақ межелі мерзім таяғанда ONAY қолданысқа енгізілмеді. Әзірге жолаушылар Oskemencard картасын пайдалана тұрады.
«Алматы қаласының көлік холдингі» ЖШС хабарлағандай, жаңа жүйенің дер кезінде іске қосылмауына тиісті санаттағы адамдардың әлеуметтік және жеңілдігі бар карталарды толық алып үлгермеуі себеп болған көрінеді. Жалпы, жүйе пайдалануға дайын, қоғамдық көліктер де жабдықтармен толық қамтамасыз етілді, барлық бағдарламалар әзірленген.
Қазір жеңілдігі бар және бірыңғай көлік карталары беріліп жатыр. Жеңілдікті карталарын алуға өтініш бермеген тұрғындар әлі де бар. Бұған дейін істеп тұрған жүйені тоқтатып жаңасын қосу бұл санаттағы азаматтарға белгілі бір қолайсыздық туғызуы мүмкін. Олардың қатарында негізінен зейнеткерлер, мүмкіндігі шектеулі жандар және көпбалалы аналар бар.
Жүйені іске қосу кезеңінде жеңілдік санатындағыларға бастапқы карта беру ONAY есебінен жүргізіледі. Бұдан кейін белгіленген тариф бойынша жүзеге асырылады. Компанияның хабарлауынша, ONAY жүйесін іске қосу 7 сәуірге жоспарланып отыр.
ТҰРҒЫНДАР НЕНІ БІЛУ КЕРЕК?
Жеңілдік санатына жататындар өтініш беріп, карта ресімдеуі қажет; өзі тұратын аудандағы орталықтардың бірін таңдайді;
оқушылар мен колледж студенттеріне оқу орны бойынша карталар беріледі (өз оқу орнындағы жауапты тұлғаға хабарласу қажет);
70 жастан асқан зейнеткерлер жеке куәлігін, 3х4 фотосуретін (электронды түрде алуға болады) және зейнетақы куәлігін әкеледі, сондай-ақ Өскеменде тұрғылықты тіркеуде болуы қажет;
жеңілдік қарастырылған басқа адамдар жеке басын куәландыратын құжатын, 3х4 фотосуретін (электронды түрде алуға болады), жеңілдік алу құқығын растайтын құжатты көрсетуі және Өскеменде тұрғылықты тіркеуде болуы қажет.
Ескерте кетейік, жеңілдігі бар немесе мектеп картаны жоғалтып алған жағдайда оны қайта қалпына келтіру бастапқы кездегідей тегін емес, ақылы болады. Қызмет құны – 800 теңге.
КАРТАНЫ ҚАЛАЙ ЖӘНЕ ҚАЙДАН АЛУҒА БОЛАДЫ?
ONAI карталары өтініш қабылданған жерде аптасына екі рет беріледі.
Жеңілдігі бар азаматтардың өтінішін қабылдайтын төрт орталық жұмыс істейді. Олар:
• ONAY халыққа қызмет көрсету орталығы – Шәкәрім даңғылы, 171.
• Өскемен қаласының жұмыспен қамту және әлеуметтік бағдарламалар бөлімі – Шәкәрім даңғылы, 149/10.
• Жастар ресурстық орталығы – Жібек жолы көшесі, 3.
• Жолаушылар тасымалын басқару орталығы – Қазақстан көшесі, 154.
Аталған мекемелердің жұмыс кестесі: 08:00-17:00.
Сондай-ақ жеңілдігі бар картаны 70 жастан асқан тұрғындар (зейнеткерлер) келесі аумақтық басқару орталықтарынан ала алады:
1. Сәтпаев даңғылы 36;
2. Пахомов көшесі 8 (үйдің артқы жағындағы кіреберіс);
3. Чехов көшесі 68;
4. Буров көшесі 24;
5. Бағдат Шаяхметов көшесі 4;
6. Атлант көшесі 38;
7. Добролюбов көшесі 25;
8. Гагарин бульвары 20;
9. Мұхамеджан Тынышпаев көшесі 123;
10. Бажов көшесі 546;
11. Максим Горький көшесі, 11а.
Орталықтардың жұмыс кестесі 8.00-ден 17.00-ге дейін.
БАСҚА ҚАЛАЛАРДА ДА ЖАРАМДЫ
Сонымен қатар жолаушылар ONAI картасын App Store немесе Google Play арқылы жүктеп алып, мобильді қосымша түрінде пайдалана алады. Виртуалды картаны шығару тегін. Ондай кезде пластик картаны сатып алудың қажеті жоқ, виртуалды картаны ONAY мобильді қосымшасымен толтыруға болады. Виртуалды картамен Өскеменнің ғана емес, сондай-ақ ONAY жүйесі жұмыс істейтін Алматы, Талдықоорған, Теміртау, Қарағанды, Сарань сияқты қалалардың қоғамдық көліктерінде де жүруге болады.
Фото: ШҚО әкімінің баспасөз қызметі
