Денсаулық сақтау министрлігі: фертильдік жастағы әйелдердің прегравидарлық дайындықпен қамтылуы 45%-ға дейін арттырылады
Елімізде жүкті әйелдердің жағдайын бақылау мен диагностикалауды жақсарту үшін тиімді шаралар қабылдап жатыр. Скринингтік бағдарламалар енгізіліп, болашақ аналардың репродуктивтік функцияларын сақтауға мүмкіндік беретін инновациялық емдеу әдістері сәтті қолданылып келеді. Соның нәтижесінде кейінгі 10 жылда алғаш рет нәресте өлімін 8,3%-ға, ана өлімін 12%-ға төмендету бойынша ең жоғары көрсеткіштерге қол жеткізілді, деп хабарлайды F16.kz.
«Әрбір әйел - әрбір бала» ана мен бала денсаулығын сақтау қызметін дамыту жөніндегі іс-қимыл жоспары шеңберінде былтыр фертилдік жастағы әйелдер арасында аурулардың профилактикасы жоспарында жаңа тәсілдерді іске асыруға қол жеткізілді, жүкті және босанатын әйелдердің маршруттары оңтайландырылды, акушерлік көмекті ұйымдастыру стандарттары өзектендірілді, босандыру қызметін үйлестіру айтарлықтай күшейтілді. Бұл ана мен жаңа туған нәресте үшін қауіпсіздік деңгейін айтарлықтай арттыруға мүмкіндік берді.
Туа бітті даму кемістіктерін азайту мақсатында еліміздің 13 өңірінде бүгінде 15 «бір күндік клиника» құрылды, онда 50 мың жүкті әйел тексеруден өтті.
Әйелдердің денсаулығын нығайту, перинаталдық нәтижелерді жақсарту, жүктілікті жоспарлаудың өркениетті және ақылға қонымды тәсілі үшін Денсаулық сақтау министрлігі «Аналар саулығы» арнайы бағдарламасын бекітті.
Анадан айырылуға әсер ететін негізгі фактор - әйелдердің экстрагениталдық аурулары және прегравидарлық дайындықтың (жүктілікке дейінгі дайындық кезеңі) төмен деңгейі.
Бағдарлама аясында елімізде алғаш рет жүктілікті жоспарлайтын фертилдік жастағы әйелдер МӘМС шеңберінде 12 базалық тексеруден өтеді. Патология анықталған кезде оларға сауықтыру бағдарламалары ұсынылады.
2025 жылы жоспарланбаған жүктіліктің санын азайту мақсатында фертилдік жастағы әйелдерді прегравидарлық дайындықпен қамту көрсеткішін 45%-ға дейін, контрацепциямен қамтуды 50%-ға дейін арттыру көзделген.
Бүгінгі таңда МСАК ұйымдарында фертилдік жастағы әйелдерді тексеру алгоритмдері бекітілді, профилактикалық қарап-тексерулермен, контрацепциямен және прегравидарлық дайындықпен қамту бойынша медициналық персонал үшін индикаторлар айқындалды.
Сонымен қатар болашақ аналар тіркелген жеріндегі емханаларда отбасын жоспарлау мәселесі бойынша бейінді мамандардан консультация ала алады.
Анемия, пиелонефрит, қант диабеті және артериялық гипертензиясы бар жүкті әйелдер АДҚ бойынша қажетті препараттармен тегін қамтамасыз етіледі.
«Әрбір әйел - әрбір бала» ана мен бала денсаулығын сақтау қызметін дамыту жөніндегі іс-қимыл жоспарын іске асыру нәтижелері бойынша 2024 жылы ана өлімін 12%-ға төмендетуге қол жеткізілді.
2024 жылдың қорытындысы бойынша босандыруда 706 ауыр жағдай тіркелді, оның 95%-ы қабылданған жүйелі шаралардың нәтижесінде әйелдердің өмірі сақталып қалды. 1000 босануға шаққандағы елдегі ауыр жағдайдың көрсеткіші 1,9. Былтыр ол 2,2 болған.
2021 жылдан бастап ауыр жағдайлардың 40%-ға төмендеуі байқалады. Алайда жүктілік кезінде алғаш рет диагноз қойылған ауыр соматикалық патологиялары бар жүкті әйелдердің өсуі байқалады.
Сондай-ақ, акушерлік-гинекологиялық көмек көрсету бойынша 25 клиникалық хаттама қайта қаралды.
Бүгінде елімізде жыл сайын орта есеппен 350 мың жүкті әйелге медициналық көмек пен күтімнің барлық спектрін қамтамасыз ететін 4,7 мың акушер-гинеколог пен 9 мыңнан астам акушер қызмет көрсетеді.
Фото: Денсаулық сақтау министрлігі
