ШҚО-да үздік жас бағдарламашылар сынға түсті

Өскеменде басталған SKILLS FOR GEEKS ІТ-чемпионатына Шығыс Қазақстан облысының 13 ауданы мен бес арнайы мектебінен 18 команда қатысып жатыр. Өңірдің түкпір-түкпірінен жиылған барлығы 224 оқушы роботты техника және бағдарламалау бойынша өздерінің дағдылары мен білімдерін ортаға салды, деп хабарлайды F16.kz.

Чемпионат ұйымдастырушыларының айтуынша, жарыстың басты мақсаты – оқушылардың талантын ашу, шығармашылық және интеллектуалдық қабілетін дамыту. Мұнда балалар іс жүзінде тапсырмалар орындап, техникамен жұмыс істейді, нақты кәсіби дағдыларды үйренеді. Сондай-ақ бұл шара өскелең ұрпақтың заманауи технологияға, инновацияға және инженерлік мамандықтарға деген қызығушылығын арттыруға бағытталған.

Бүгін Өскеменде SKILLS FOR GEEKS чемпионатының ашылу салтанаты өтті. Бұл чемпионаттың өтіп келе жатқанына сегіз жыл болды. Қатысушылар 10+ және 14+ жас санаттарында сынға түседі. Алғашқы іріктеу кезеңі аудан және қалаларда өтті, бүгін облыстық кезең басталды. Негізгі бағыттар – роботты техника, 3D-моделдеу және бағдарламалау. Балалар үш сағат бойы тапсырмалар орындап, өздерінің дағдыларын көрсетеді, кейін қазылар алқасы нәтижелерді қорытындылайды, – деді Шығыс Қазақстан облыстық Örken аймақтық ғылыми-әдістемелік орталығының директоры Сергей Коваленко.

Фестивальға қатысушы, Алтай қаласынан келген Родион Абдурахманов өз мақсатымен бөлісті.

Роботты техника бойынша жарысқа қатысып жатырмын. Мектепте үздік шығып, чемпионатқа жолдама алдым. Облыстың кезеңде бірінші орынды жеңіп алып, республикалық чемпионатқа барғым келеді, – деді ол.

Жас ІТ мамандарды Шығыс Қазақстан облысының әкімі Нұрымбет Сақтағанов қолдап, цифрландырудың ел үшін маңызын атап өтті.

Қазір цифрлық технология барлық салаға еніп жатыр, оның ішінде білім беру де бар. Біз тек уақыттан қалып қоймай, оны алдын ала білуіміз керек. Жасанды интеллект, киберқауіпсіздік, бағдарламалау – бұл тек сөз емес, бүгінгі таңда бәсекеге қабілетті мамандарды даярлайтын нақты дағдылар, – деп атап өтті аймақ басшысы.

Ұйымдастырушылар бұл чемпионат жастар арасында жаңа өнімдер шығару мен қызмет көрсету саласында тың идеяларды, креативті бастамаларды дамытуға ықпал етеді деп үміттенеді. Сонымен қатар жастардың болашақта мамандық таңдауына да мұндай шаралардың тигізер пайдасы көп болмақ.