Көлігі көп Өскеменде кептеліс азая ма: жаңа жобалар қолға алынды

Өскеменде көліктер саны жылдан-жылға өсіп жатыр. Осыдан екі жыл бұрын облыс орталығында 226 мыңнан астам темір тұлпар тіркелген, ал қалада тұратын отбасылар 124 мыңның үстінде. Демек әр үйге екі мәшіннен келеді. Уақыт өткен сайын көшелерде көлік қозғалысы қиындап, кептеліс болуы сондықтан. Қала билігі бұл проблеманы шешу үшін жол айырықтарын салып, көлік инфрақұрылымын дамытуға кірісті, деп хабарлайды F16.kz.

КӨПДЕҢГЕЙЛІ ЖОЛ АЙЫРЫҒЫ САЛЫНАДЫ

Көшедегі көлік жүктемесін азайтып, кептелісті сейілту, сондай-ақ тұрғындардың жүріп-тұруына жайлы жағдай жасау үшін бірқатар жоба қолға алынған. Солардың бірі –Сәтпаев пен Есенберлин даңғылдарының, Жібек жолы мен Базовая көшелерінің түйіскен тұсындағы көпдеңгейлі жол айырығы. Бұл жол айырығы іске қосылғанда Ертістің сол жағалауынан оң жағалауына қарай және кері бағытта ағылатын мәшіндердің еш кедергісіз, бағдаршамсыз жүруіне мүмкіндік туады. Яғни, Сәтпаевтың бойында иін тіресіп тұратын ұзын-сонар кептеліс болмайды. Бірақ даңғылмен ағылған көліктердің нөпірі Ертіс көпірінің алқымындағы айналма жолға келіп тағы кептеледі. Өскемен әкімдігі бұл мәселені шешу үшін Ертіс көпірінің астымен өтетін жолды былтыр салып бастаған, кейін белгісіз себептермен құрылыс тоқтап қалды. Жоба биыл қайта жанданбақ.

Айналма жолдағы көлік жүктемесін азайту мақсатында салынып бастаған көпір асты жолының құрылысы жалғасады. Онда біраз жұмыс атқарылған, жобаны аяқтаймыз. Жыл соңында көпір асты жолымен жүресіздер, – деді Өскемен қаласының әкімі Алмат Ақышов.

КӨПІРДІҢ ҮСТІ - “КӨРТЫШҚАННЫҢ ІНІ”

Көктем шықса еріген қармен бірге асфальті “ағып кететін” Ертіс көпірінің үстіндегі жабынды жаңарту, қайтадан сапалы төсеу мәселесі де күн тәртінбе тұр. Өйткені дәл осы көпірдің үстіндегі көртышқанның ініндей шұрық тесік жолға көлік жүргізушілерінің айтар шағымы көп. Әлеуметтік желілерде күрделі жөндеуден өткеніне көп болмаған көпірдің аянышты жағдайынан хабар беретін фотосуреттер мен бейнежазбалар қаптап жүр. Жұртты мазалаған проблеманы қала әкімдігі біледі және оны түбегейлі шешудің мүмкіндігін қарастырып жатыр.

Ертіс көпірінің жағдайын жақсы білеміз. Иә, мәселе бар. Шұңқырларды жылда бітейміз, келесі көктемде қайта ойылып жатады. Енді көпір бетіндегі жабынның бетонға дейінгі барлық қабатын мұқият тексереміз. Нені жаңарту қажеттігін анықтаймыз. Содан кейін жөндеуге кірісеміз және 10 жылға дейін шұңқыр жамауды ұмытатындай етіп сапалы жүргізу керек, – деді Ақышов.

Оның айтуынша, әзірге көпірдің жабынына орташа жөндеу жүргізілмейді, бірақ көп ұзамай шұңқырлар бітеледі.

Фото: F16.kz

Ctrl

Enter

Қатені көрсеңіз

Мәтінді белгілеп Ctrl+Enterбасыңыз

Пікірлер (0)

Мы в

Ұнады 0

Ұнамады 0