ШҚО-да қарияларды спорттық орталықтан қуып шыққан ба?

Өскемен қаласында қарияларды бос уақыттарын тиімді өткізіп жүрген спорттық орталықтан Шығыс Қазақстан облысының дене шынықтыру және спорт басқармасы шығарып тастаған, деп хабарлайды F16.kz сайты.

Ақсақалдарға Орталық бассейн ішіндегі бос тұрған бөлмелердің бірі облыстың бұрынғы әкімі Даниал Ахметовтің тұсында берілген екен. Онда қариялар стол теннисімен, жүзумен, тренажерлық жаттығулармен, бильярд, шахмат, дойбы ойнаумен айналысқан. Бөлмеге ішкі жөндеу жұмыстарын өздері жүргізіп, қажетті спорттық құрал-жабдықтарын да әкеліп алған. Енді қайда барарларын білмей жүрген көрінеді.

Айта кетсек, осы жылдың басынан бастап облыс әкімі Ермек Көшербаев қарияларды секциялар және үйірмелермен қамту қажеттігін алға тартып, қалалар мен аудандарда белсенді ұзақ өмір сүру орталықтарын құру туралы тапсырма берген болатын. Ал сонда спорт басқармасының бұл шешімі әкімнің тапсырмасына мүлде қайшы әрекет емес пе?

Айтпақшы, қарияларды бұған дейін 2019 жылы Стаханов көшесіндегі ФОК ғимаратынан, «бұл бөлме өзімізге керек деп», ондағы басшылық тағы қуып шығыпты. Спорттық керек-жарақтарын рұқсатсыз дәлізге шығарып тастаған бассейн басшылығына да өкпелі. Өздерінің бос уақыттарын тиімді өткізіп жүрген орында қалдыруларын сұрап ШҚО әкімі Ермек Көшербаевқа хат жазыпты. Сондай-ақ бассейн басшылығын сотқа беруге ниетті екендерін жеткізді.

– Спорт ардагерлерінің, жалпы еңбек ардагерлерінің бос уақыттарын мәнді өткізулеріне біршама жақсы жағдайлар жасалған. Бәрін жоққа шығармаймыз. «ШҚО спорт ардагерлерінің кеңесі» қоғамдық бірлестігінің жасаған кестесі бойынша Жібек маталар аумағындағы «Спорттық кешен» ғимараттарында стол теннисімен, жүзумен, тренажерлық залда жаттығулармен, бильярд пен шахмат, дойбы ойнаумен айналысып келді. Бірақ биыл Отан қорғаушылар мерекесі мен Жеңіс мерекесі қарсаңында бассейн басшылығы ардагер бильярдшылардан төрт жылдан бері пайдаланып келе жатқан бөлмелерін босатуды талап етті. Себеп: «Біз бассейн әкімшілігімен бөлмені жалға алу бойынша келісім-шартқа отырмаппыз». Мұндай «заңсыздықты» тексеру жүргізген облыстық қаржы басқармасының аудиторлары анықтап, осыдан біраз уақыт бұрын бассейн башылығына жазбаша өкім қалдырып кетіпті. Енді бізден сұрамастан ішіндегі өзіміз сатып алған заттарымызды, спорттық құралдарымызды, бильярдты шығарып тастапты. ШҚО әкіміне ардагерлер кеңесінің төрағасы арқылы мәселені жеткізгенбіз. Енді қайта хат жазып отырмыз, үш айдан бері ШҚО дене шынықтыру және спорт басқармасының басшысы маза бермеді. Тіпті, қоқан-лоқы көрсетуде, ондай адамның қалай білдей бір басқарманы басқарып отырғанына таңым бар, – дейді еңбек ардагері Серік Түгелбаев.

Қариялардың мәселесімен танысуға келген ШҚО дене шынықтыру және спорт басқармасы басшысының орынбасары қазақша пікір білдіре алмаймын деп, мекеме басшысына сілтеді.

– Бұл ғимарат ішіндегі бөлме кезінде облыстық әкімдіктің тапсырмасымен қарияларға беріліпті. Алайда ол кісілер мекемемен ешқандай шарт жасаспаған. Бұған дейін біз ұсынған шартпен өздері келіспеді. Енді өзіміздің спорт мектебінің балалары сыймай жатқандықтан бөлмені босатуды сұрадық, – дейді «ШҚО су спорты түрлері бойынша БЖСММ» КММ директоры Олжас Ғазизұлы.

Қариялар тағы бір мәрте облыс әкіміне кіріп, көмек сұрап көретіндерін айтады.

Ctrl

Enter

Қатені көрсеңіз

Мәтінді белгілеп Ctrl+Enterбасыңыз

Пікірлер (0)

Мы в

Ұнады 1

Ұнамады 0