Өскеменде ерекше балаларға арналған орталық ашылды

Өскеменде «Демеу» арнаулы әлеуметтік қызметтер көрсету ресурстық орталығы жұмысын бастады, деп хабарлайды F16.kz.

Бүгін өткен салтанатты іс-шараға облыс әкімі Нұрымбет Сақтағанов қатысып, жиналған қауымды жаңа орталықтың ашылуымен құттықтады. Аймақ басшысы бұл мүмкіндігі шектеулі балаларды тәрбиелеп отырған отбасыларды кешенді қолдау бағытында мемлекет тарапынан қолға алынған маңызды қадамдардың бірі екенін атап өтті.

– Мемлекет басшысы Қасым-Жомарт Келемұлы Тоқаев барлық облыс орталығында заманауи оңалту орталықтарын ашу жөнінде тапсырма берген болатын. Бүгін осы тапсырмаға орай, Өскеменде жаңа орталықты ашып отырмыз. Әрине, бірінше кезекте осындай маңызы зор жұмысқа атсалысқан, басы-қасында жүрген барлық азаматқа, ата-аналарға, кәсіпкерлерге алғыс білдіргім келеді. Өйткені, бұл нысандағы жөндеу жұмыстары мемлекеттік бюджет есебінен жүргізілгенімен, ғимарат ішіндегі құрал-жабдықтар, техника мен жиһаз жомарт жандардың қаражатына сатып алынған. Сондықтан бұл жобаны мемлекеттік-жекеменшік серіктестіктің жарқын бір мысалы ретінде келтіруге болады, – деген облыс әкімі алдағы уақытта да өңірдегі ерекше қажеттіліктері бар балалар мен олардың жақындарына жан-жақты қолдау көрсетіле беретінін жеткізді.

Сонымен қатар, аймақ басшысы жаңа орталыққа бір миллион теңгенің сертификатын табыс етті. Бұл күні өзге ұйымдар мен мекемелер атынан берілген сыйлық та аз болған жоқ.

Белгілі болғандай, Шығыс Қазақстанда 3 615 мүмкіндігі шектеулі бала бар және оның 2 156-і Өскемен қаласында тұрады екен. Қазіргі уақытта 685 мүмкіндігі шектеулі бала арнайы әлеуметтік қызметпен қамтылған. Мемлекеттік әлеуметтік тапсырыс арқылы 134 балаға оңалту, білім беру, түзету қызметтері көрсетілуде.

Мемлекет мұндай отбасыларға әлеуметтік төлемдерді рәсімдеу, оңалтуға арналған техникалық көмекші құралдар мен үйде оқыту шығындарын өтеу, психологиялық және педагогикалық қолдау секілді бірқатар әлеуметтік көмек ұсынады.

Жаңа ресурстық орталықтың жұмысы қызмет сапасын арттырып, ата-аналар мен балаларға тиімді әрі қолжетімді көмек көрсетуге бағытталған. Бұл туралы орталықтың басшысы Мадина Әуренова айтты.

– Біз орталыққа келген балалар мен олардың ата-аналарына жан-жақты жәрдем беруге тырысамыз. Балалармен білікті мамандар жұмыс жасайды. Мәселен, церебралды сал ауруына шалдыққан балақайлар логопед, емдік дене тәрбиесінің инструкторы, эрготерапевт, нейропсихолог, массажист, дефектолог, психолог сияқты мамандардың көмегін алады. Сонымен қатар, балалармен топтық жұмыстар жүргіземіз. Бұл балақайлардың жаңа ортаға тез бейімделуіне көмектеседі, – деді Мадина Әуренова.

Оның айтуынша, бүгінде бұл орталыққа мүмкіндігі шектеулі 60-тан астам балақай келеді екен. Оларға 20-дан аса маман қызмет көрсетеді. Орталықта реабилитологтың кеңесі, емдік және бейімдік дене шынықтыру, дамытушы сабақтар, ерекше білім беру қажеттілігі бар балаларды мектепке дайындау, қолөнер мен сурет салу үйірмелері бар. Сонымен қатар, сенсорлық интеграция залы, релаксация бөлмесі, демалыс және ойын бөлмелері ашылған. Ерекше балалардың ата-аналары психологтың көмегіне жүгіне алады.

Жалпы, облыс орталығында мұндай жұмыс осыған дейін де жүргізіліп келген. Сондықтан жергілікті мамандардың біліктілігі мен тәжірибесіне қатысты сұрақ туындамауға тиіс, дейді орталықтың басшылығы.

Мамандардың бұл сөзіне ата-аналар да қосылып отыр. Сондай жандардың бірі – Дана Рахымбаева есімді ана мұндай орталықтар аса қажет екенін, сондықтан жаңа орталықтың ашылуына шын жүректен қуанышты екенін жеткізді.

– Біз бұл орталыққа алты жыл бұрын келгенбіз. Бастапқыда қызым сөйлей де, отыра да алмайтын. Шүкір, бүгінде бұл сынақтардың бәрін біртіндеп еңсеріп келеміз. Осы ретте бізге көмек қолын созған барлық жанға алғыс айтқым келеді, – дейді сегіз жастағы Ясминнің анасы.

Айта кетейік, бұл күні жиналған қауым назарына ұсынылған мерекелік концерттік бағдарлама да көптің көңілінен шықты.

Фото: ШҚО әкімінің баспасөз қызметі

Ctrl

Enter

Қатені көрсеңіз

Мәтінді белгілеп Ctrl+Enterбасыңыз

Пікірлер (0)

Мы в

Ұнады 0

Ұнамады 0