Өскемендегі «бірінші қалалық ауруханада» жөндеу жұмыстары қашан аяқталады?

Өскемендегі облыстық мамандандырылған медициналық орталық қайта қалпына келтіріліп жатыр. Халық арсында «№1 қалалық аурухана» аталып кеткен нысан 40 жылдан бері жөндеу көрмей, әбден тозығы жеткен, деп хабарлайды F16.kz.

Медицналық мекемедегі қызмет сапасына, тар палаталар мен ескі жиһаздарға шаһар тұрғындары жиі шағымданатын. Бұған дейін жөндеу жүргізілетіні бірнеше рет айтылғанымен, жұмыстар жекелеген бөлмелерді жөндеумен шектеліпті.

Бүгінде көптен күткен қайта қалпына келтіру жұмыстары жүргізіліп жатыр. Ауруханадағы желдету жүйесінен бастап, палатадағы шақыру батырмаларына дейін жаңарту жоспарланып отыр.

Былтыр мамырда облыс әкімі мекемеге келіп, жағдаймен егжей-тегжейлі танысып, жөндеу жұмыстарын бастауға тапсырма берген. Артынша электр, желдету жүйелері мен инженерлік коммуникацияларды ауыстыруға қаражат бөлінді. Қазір «Қазцинк» компаниясының қолдауымен гинекология бөлімі жөнделіп жатыр. Екі аптадан кейін пациенттер жаңа палаталарға көшеді. Аурухана аумағын да абаттандырып жатырмыз. Бөлімшелердің барлығы кезең-кезеңімен жаңартылады, – дейді ШҚО ММО бас дәрігері Шолпан Макашева.

Жоспар бойынша жұмыстар толықтай 2026 жылы аяқталуға тиіс. Қазіргі күні ғимараттың желдету жүйесін ауыстыру толықтай аяқталған.

Науқастарға барынша қолайлы жағдай жасау үшін палаталарға дәретхана орнаттық. Бұл жұмыстар 90% аяқталды, 30 маусымға дейін толық тапсырылады, – дейді құрылыс учаскесінің бастығы Амангелді Сембинов.

Аурухананың қабылдау бөліміне күніне 200-ге жуық адам жүгінеді. Келушілерді қабылдайтын бөлімнің де жағдайы мәз емес, дәліз тар, бөлмелер ескі. Аурухана басшылығының сөзінше, алдағы уақытта бөлім жеке инвестиция есебінен жөнделмек. Инвестиция көлемі – 1 миллиард теңгеден асады.

Қазіргі қабылдау бөлімінің ауданы – 350 шаршы метр. Бұл санитарлық талаптарға сай емес. Болашақта республикалық нефрологиялық орталық «BB Nura» ЖШС қолдауымен жеке ғимарат салынады. Оның ауданы шамамен 1000 шаршы метр болады. Бірінші қабатта – қабылдау-диагностикалық бөлім, екінші қабатта – гемодиализ төсектері бар нефрология бөлімі орналасады, – дейді бас дәрігердің орынбасары Марат Нұрбикенов.

Фото: ШҚО ішкі саясат басқармасы

Ctrl

Enter

Қатені көрсеңіз

Мәтінді белгілеп Ctrl+Enterбасыңыз

Пікірлер (0)

Мы в

Ұнады 0

Ұнамады 0