Елеусіз қалған қаһармандардың есімі 500 көшеге беріледі

Ұлы Жеңістің 80 жылдық мерейтойына орай елімізде 500-ден астам көшеге бұған дейін есімі елеусіз қалған майдангерлердің есімі беріледі, деп хабарлайды F16.kz.

Мұндай жағымды жаңалықты Президент Қасым-Жомарт Тоқаев Қазақстан халқы Ассамблеясының кезекті ХХХІV сессиясында айтты.

Бірер күн бұрын менің тапсырмаммен Республикалық ономастикалық комиссия елді мекендердегі 500-ден астам көшеге бұған дейін елеусіз қалған жергілікті қаһармандардың есімін беру туралы шешім қабылдады. Ең алдымен, жаңа және атауы қайталанатын көшелерге басымдық беріледі. Бұл шешім – Ұлы Жеңісті, оған қатысушыларды қаншалықты қадір тұтатынымызды көрсететін маңызды қадам, – деді Қ.Тоқаев.

Мемлекет басшысы Ұлы Жеңіс туралы айтқанда ең әуелі ержүрек батырларды еске алып, олардың жанқиярлық еңбегі мен көзсіз ерлігін, парызға адал, антқа берік болғанын жас ұрпаққа үлгі ету керектігін айтты.

Мен Жеңістің 80 жылдығына дайындық туралы осыдан бір жарым жыл бұрын алдын ала айттым. Соған сәйкес біз «Ұлы Жеңіс: ерлікке тағзым, ұрпаққа үлгі» жоспарын арнайы қабылдап, жүзеге асыра бастадық. Осы ауқымды жұмыстың аясында 2 мыңнан астам мәдени, ғылыми-зерттеу, ағарту және басқа да іс-шаралар өткізіледі. Ең бастысы, әрине, мемлекет пен қоғамның ерекше қорғауында болатын құрметті ардагерлерімізге айрықша көңіл бөлеміз, – деп қосты Президент.

Айта кетейік, Ұлы Жеңістің мерейлі датасын атап өтуге арналған іс-шаралар легі ауқымды әскери шеруге жалғасады. Әскери шерудің мән-маңызы зор. Себебі мұны бір жағынан майдангерлер мен тыл ардагерлеріне тағзым десек, екінші жағынан қазіргі күрделі геосаяси ахуалда ұлттық рухымыздың мықтылығын көрсететін символ деуге болады.

Естеріңізге сала кетсек, бүгін Астанада Қазақстан халқы Ассамблеясының кезекті ХХХІV сессиясы өтті. Оған Президент Қасым-Жомарт Тоқаев қатысып, сөз сөйледі.

Фото: Ақорда

Ctrl

Enter

Қатені көрсеңіз

Мәтінді белгілеп Ctrl+Enterбасыңыз

Пікірлер (0)

Мы в

Ұнады 0

Ұнамады 0