Орындықтар – Португалиядан, парталар – Петропавлдан: ШҚО-ның ауыл мектебінде арнайы кабинет ашылды

Катонқарағай ауданы, Белқарағай ауылының О.Бөкей атындағы орта мектебінде роботты техника кабинеті ашылды, деп хабарлайды F16.kz тілшісі.

Жаңа кабинеттің ашылуы салтанатына аудандық білім бөлімінің әдіскерлері Алма Тілеубаева мен Айдос Жақсыбердинов, «Білім беруді тұрақты дамыту» қорының атқарушы директоры Данияр Тоқтарбаев, белқарағайлық ұстаздар мен оқушылар, сондай-ақ ауыл тұрғындары қатысты.

Бүгінде елімізде жастардың сапалы білім алуына көп мүмкіндік жасалып отыр. Инновациялық технологияны мектеп жасынан меңгеріп, қыр-сырын үйренуге мемлекет барынша қолдау көрсетіп келеді. Бүгін міне ауыл мектебінде осындай заманауи жабдықталған су жаңа роботты техника кабинеті есігін айқара ашты. Бұл ауыл мен қаланың арасындағы білім алшақтығын азайтып, ауыл балаларының сапалы білім алуына таптырмас орын болары анық, – деді аудандық білім бөлімінің өкілдері.

Айта кетейік, биыл Катонқарағай ауданының оқушылары алғаш рет роботты техника бойынша өтетін WorldSkills облыстық сайысына қатысып, жүлделі бірінші және үшінші орындарды жеңіп алған.

КӘСІПКЕРДІҢ ҚОЛДАУЫ

Белқарағайдағы роботты техника кабинетін осы ауылдың тумасы, О.Бөкей атындағы орта мектептің түлегі, ALIM GROUP компаниясының директоры Гүлназ Сағындықова өз қаражатына ашып отыр. Кабинеттің жиһаздары мен жабдықталуын, барлық қажетті құрылғылар отандық және шетелдік компанияларда өндірілген.

Заманауи білім беру кабинетінің ашылуына «Білім беруді тұрақты дамыту» қоғамдық қоры да атсалысқан. Кабинет жабдықтарының ішінде соңғы үлгідегі екі Bambu Lab 3D-принтері, отандық Artisan компаниясының бағдарламалық модельдеу құралдары, лего-спайк қораптары, интерактивный тақта, ноутбуктар бар. Сондай-ақ демеушілер кабинеттің ішіне жөндеу жүргізген – еденіне линолеум төсеп, терезелеріне шымылдық ілген, қабырғаларын әктеген.

Бұл кабинет бүгінгі заман талабына сай жабдықталған. Ішіндегі барлық жиһаз бен құрал-жабдықтар сапалы жасалған. Айталық, парталарды Петропавлдан әкелсе, орындықтарды Португалиядан жеткізді. Болашақта осы жерден білім алған шәкірттер еліміздің мерейін асқақтатар мықты азамат боп өссін, талапты да талантты оқушылар көбейе берсін, – деді «Білім беруді тұрақты дамыту» қорының атқарушы директоры Данияр Тоқтарбаев.

ҰЛАҒАТТЫ ҰСТАЗДАРДЫҢ ЕСІМІ БЕРІЛДІ

Жаңадан ашылған роботты техника кабинетіне Гүлназ Сағындықованың ата-анасы Нұрлан Қалиекперұлы мен Бақытжамал Қабдешқызының есімдері берілді. Ерлі-зайыпты Жайлыбаевтар – 40 жылдан астам уақыт О.Бөкей атындағы орта мектепте еңбек еткен жандар.

Былтыр Серік Құлымбекұлы Толықпаевпен Өрел орта мектебінің жобаларын көргенбіз. Сол кезде маған қатты ұнаған еді. Содан өзіміздің ауылда бұл жобаны іске асыруды ойладық. Бұл – бір жағынан ата-анамызға деген зор құрметіміз, екіншіден бүгінгі жас ұрпақтың сапалы білім алуына қолайлы жағдай жасағымыз келгендігі, – деді Гүлназ Нұрланқызы.

Тимур Серікхан

Фото: F16.kz

Ctrl

Enter

Қатені көрсеңіз

Мәтінді белгілеп Ctrl+Enterбасыңыз

Пікірлер (0)

Мы в

Ұнады 0

Ұнамады 0