Үш облыс әкімі өңірлерді дамытудың жаңа тәсілін талқылады
Премьер-Министрдің орынбасары Қанат Бозымбаев жұмыс сапары аясында Семей қаласында Шығыс Қазақстан, Абай және Павлодар облыстарының әлеуметтік-экономикалық дамуына арналған кеңес өткізді. Кеңесте өңірлерді дамыту саясатын жүзеге асырудың жаңа тәсілдері қаралды, деп хабарлайды F16.kz.
2028 жылға дейін үш өңірде ауыл шаруашылығы, тау-кен металлургия кешені, туризм және қайта өңдеу салаларында жалпы құны 6,5 трлн теңге болатын 102 инвестициялық жобаны іске асыру жоспарланып отыр. Жиын барысында өңдеуші өндірістерді, ШОБ кластерлерін және Катонқарағай, Зайсан, Алакөл, Шүлбі су қоймасы және басқа да туристік аймақтарды дамыту қажеттілігі туралы да сөз қозғады. Сондай-ақ жобаларды жүзеге асыруда шекара маңы ағындарын ескере отырып, өңірлердің көлік-логистикалық әлеуетін пайдалану маңызға ие екендігі, ауылдар мен моноқалаларды қолдауға ерекше назар аудару қажеті де айтылды.
«Ауыл аманаты» жобасы аясында «Amanat» партиясы мен әкімдіктер ауылдардың мамандануын анықтау арқылы скрининг жүргізуді аяқтады. Вице-премьер ауыл шаруашылығы кооперативтерін құруды және ауылдарда шағын өнеркәсіптік аймақтар қалыптастыруды скрининг нәтижелері негізінде бастауды тапсырды.
Қанат Бозымбаев облыс әкімдерінің есептерін тыңдады.
ШҚО әкімі Нұрымбет Сақтағановтың айтуынша, өңір инвестиция тарту, әртараптандыру, экономиканы өсіру, халықтың әл-ауқаты мен өмір сүру сапасын арттыру бағытында жұмыс жүргізіп жатыр.
Экономиканы әртараптандыру мақсатында өңірлік жобалық кеңсе құрылған, барлық қала және аудандар үшін 2,8 трлн теңгеге экономикалық өсім нүктелерінің бесжылдық жоспарлары мен ауылдық округтерге арналған «Жол карталары» бекітілген. Бұл жоспарлар 2026–2030 жылдарға арналған қала және аудан даму жоспарларына интеграцияланатын болады.
«Өңірлік ерекшеліктерді ескере отырып, біз облысымыздың дамуы үшін келесі басым бағыттарды байқаймыз: логистика, туризм, инфрақұрылым, өнімді өңдеу, цифрландыру», – деді Нұрымбет Сақтағанов.
Сонымен қатар, өңір экономикасының өсуі мен инвестиция тарту бойынша қойылған міндеттердің орындалуына қалалар мен аудандар әкімдерінің жауапкершілігін арттыру мақсатында облыста KPI көрсеткіштері бойынша әкімдіктердің рейтингтік бағалау жүйесі енгізілген.
Кеңес қорытындысы бойынша өңір әкімдіктеріне және тиісті министрліктерге бірқатар тапсырмалар берілді.
Фото: ШҚО әкімінің баспасөз қызметі
