Катонқарағайда ғасырлық тарихы бар дүкен әлі істеп тұр

Буырқанған Бұқтырманың жағасында ілгеріден орын тепкен Аққайнар деген ауыл бар. Катонқарағай ауданына қарайтын осы ауылда ықылым заманнан сыр шертетін киелі жерлер мен тарихи ескерткіштер көп. Солардың бірі – жергілікті халық «Самар» атап кеткен орыс көпесінің дүкені. F16.kz редакциясы ғасырлықтарихы бар көне ғимарат туралы қызықты деректерді оқырман назарына ұсынады.

ӘКІМНІҢ ӘҢГІМЕСІ

Көненің көзіндей болған «Самар» дүкені әлі күнге дейін жұмыс істеп тұр. Ғимараттың қабырғаларының сыртқы сылағы түсіп, тозғаны болмаса іргетасы мықты. Ескі дүкеннің тарихын аққайнарлықтар жақсы біледі. Әсіресе, өлке тарихынан хабары мол ауыл әкімі Серетхан Құрманов көне ғимарат туралы көп мағлұмат айтты.

1860 жылы Черноваға (ауылдың ескі атауы) алғашқы переселендер келгенде, осында станица болған екен. Орталық болғандықтан, осы жерлерге орыстың ауқатты азаматтары келіп, қоныстана бастайды. Жергілікті қариялар ертеректе ауылда қосқабатты ағаш үйлер, көше бойындағы тақтайдан төселген тротуарлар болған деп айтатын. Ал мына ескі дүкенді сол уақытта Луганин деген орыс көпесі салыпты. 1917 жылы қазан төңкерісінен кейін ол бар мүлкін тастап, кетіп қалыпты. Қай жаққа кеткені белгісіз. Ауылда әйелі қалып қояды. Араларында бала болмапты. Әлгі бәйбішесі өткен ғасырдың 70-ші жылдарына дейін осында өмір сүрген. Көп қиындық көрді, – деді Серетхан Құрманов.

КАРГОН МЕН САМАР ҚАЙДАН ШЫҚТЫ?

Дүкен қызыл кірпіштен салынған, астында жертөлесі де бар. Оның жанында жапсарлас қоймасы тұр. Кеңес заманында да істеп тұрған. Қазір де бұл ғимарат жергілікті кәсіпкерлердің бірінің меншігі. Азық-түлік пен тұрмыстық заттар, киім-кешек сатылады.

Аққайнар ауылының дәл ортасында Секер тауы бар. Тұрғындар бұл таудың арғы жағын, яғни шығыс бөлігін Каргон, бергі жағын Самар деп атайды. Бұлай деп аталуының өзіндік тарихы бар көрінеді.

Переселендер келген заманда ауылда қоныстанған Филипп Каргонскийдің есіміне байланысты қойылған дейді үлкендер. Әлі күнге дейін Каргон дейміз. Бергі жағы Самар. Ресейдің Самар өлкесінен жер ауғандарға байланысты қойылыпты, - деді ауыл әкімі.

Тимур Серікхан

Фото: F16.kz

Ctrl

Enter

Қатені көрсеңіз

Мәтінді белгілеп Ctrl+Enterбасыңыз

Пікірлер (0)

Мы в

Ұнады 0

Ұнамады 0