Қасым Қайсенов кентінде бірнеше әлеуметтік нысан салынады

Қасым Қайсенов кентінде жаңа мектеп пен балабақша салу мүмкіндігі қарастырылып жатыр. Бұл туралы ШҚО әкімі Нұрымбет Сақтағанов Ұлан ауданына барған жұмыс сапары кезінде айтты, деп хабарлайды F16.kz тілшісі.

Қазір кенттегі 320 балаға арналған орта мектепте 500-ден астам бала екі ауысымда оқиды. Алайда аудан орталығында халық саны артып келе жатқандықтан оқу кабинеттері мен спортзалға бала сыймай жатыр.

Өңір басшысы мәселені шешу үшін жаңа білім ордасы мен балабақша салу мүмкіндігін қарастыратынын айтты.

Халық саны жылдан-жылға өсіп келе жатқанын ескерсек, мемлекеттік білім беру стандарттарын сақтау үшін 600 орындық мектеп салу қажеттілігі туындайды. Жаңа білім ордасы салынса кенттегі оқу орнының тапшылығы мәселесі шешіледі. Сондай-ақ салалық сараптамалық-сметалық комиссияның қорытындысына сәйкес, Қасым Қайсенов кентінде мемлекеттік-жекеменшік серіктестік тетігін пайдалана отырып, 280 орындық балабақша салу мүмкіндігін де қарастырамыз, - деді аймақ басшысы.

Жақын күндері аудан орталығының тұрғындары үшін маңызды тағы бір нысан қолданысқа берілмек. Қазір мұнда «Ауыл – ел бесігі» бағдарламасы аясында бір ауысымда 150 адамды қабылдайтын жаңа емхана құрылысы жүріп жатыр.

Құрылыс жұмыстары аяқталуға жақын, қолданысқа көп ұзамай беріледі. Айта кетейік, емхана тек кент тұрғындарына емес, жақын маңдағы ауылдардың халқына да қызмет көрсетеді. Яғни аудандық емхана болып саналады. Халыққа сапалы қызмет көрсету үшін жаңа жабдықтар әкелінеді. Атап айтсақ, бактериалогиялық зертхана, рентгенологиялық зертхана, флюорография, маммография, эндоскопиялық аппараттар және заманауи УДЗ аппараттары әкелінеді, - деді Ұлан аудандық ауруханасының бас дәрігері Қайрат Өскембаев.

Бұл емхананы тұрғындар көпткен күткені рас. Себебі Ұлан аудандық ауруханасы Таврия ауылында орналасқан. Ал Қайсенов кентінде тек дәрігерлік амбулатория жұмыс істеп тұр. Медициналық орталық тұрғын үйдің екінші қабатында орналасқандықтан қызметкерлерге де, емделушілерге де қолайсыздық туғызады.

Ctrl

Enter

Қатені көрсеңіз

Мәтінді белгілеп Ctrl+Enterбасыңыз

Пікірлер (0)

Мы в

Ұнады 0

Ұнамады 0