ШҚО-да студенттерге арналған қаржылық қауіпсіздік форумы өтті

С.Аманжолов атындағы ШҚУ базасында облыстық экономикалық тергеп-тексеру департаментінің ұйымдастыруымен студенттерге арналған қаржылық қауіпсіздік форумы өтті, деп хабарлайды F16.

ҚР Қаржылық мониторинг агенттігі Мемлекет басшысының «Заң және тәртіп» қағидаты негізінде жастарды алаяқтық схемалардан сақтандыру және алдын алуға көп көңіл бөле бастады. Яғни осы шаралар аясында студенттердің құқықтық сауаттылық деңгейін арттырып, қаржылық қауіпсіздік саласындағы заманауи трендтер туралы түсініктерін қалыптастырмақ.

Мемлекет басшысы жастардың қаржылық қауіпсіздігін сақтауға ерекше көңіл бөліп отыр. Бұл тапсырма аясында өңірде Қаржылық мониторинг агенттігінің жергілікті департаментімен бірлескен біраз жұмыстар жүргізіліп жатыр. Әсіресе, ЖОО мен колледждерде семинарлар ұйымдастырылып, түсіндіру жұмыстары қолға алынған. Осы орайда жастар жеңіл ақшаның соңы қиындыққа әкелетінін ұғынуы керек, - деді ШҚО әкімі Нұрымбет Сақтағанов.

Айта кетейік, аталған форум қаржылық қауіпсіздік жөніндегі Ұлттық олимпиадаға дайындық аясында ұйымдастырылып отыр. Форум барысында арнайы оқытушылар мен департамент қызметкерлері дәріс оқып, тақырыпты түрлі ойын арқылы түсіндіреді. Олимпиадада ерекше көзге түсіп, үздік атанған студенттер Ресейдегі халықаралық олимпиадаға жолдама алмақ.

Біздің күнделікті өмірімізде цифрландырудың орны ерекше. Заманауи технология дамыған заманда әр адам қаржы мәселесінде сауатты болу керек. Әсіресе жас буынның білімі маңызды рөл атқарады. Сауатты жастар – сауатты қоғам. Қазір алаяқтық белең алып тұрған заманда онымен күреске қоғамның әр азаматы атсалысуға міндетті деп ойлаймын, - деді дәріске қатысушы С.Аманжолов атындағы ШҚУ студенті Жігер Сәрсенбаев.

Қаржылық қауіпсіздікті насихаттауға бағытталған форум 11 сәуірге дейін жалғасады.

Фото: ШҚО ішкі саясат басқармасы

Ctrl

Enter

Қатені көрсеңіз

Мәтінді белгілеп Ctrl+Enterбасыңыз

Пікірлер (0)

Мы в

Ұнады 0

Ұнамады 0