Киберқылмыстың көбеюі алаңдатады
Шығыс Қазақстан облысы ішкі саясат басқармасының басшысы Ернұр Бурахан өңірдегі саяси партиялардың өкілдерімен кездесті, деп хабарлайды F16.kz.
Кездесу барысында тараптар қоғамды толғандырып отырған бірқатар маңызды тақырыпты талқылады.
Кездесуде қаузалған басты тақырыптың бірі Ұлы жеңістің 80 жылдығына арналған іс-шаралар жоспары болды. Қатысушылар жастарға патриоттық тәрбие беру мен тарихи жадымызды сақтау маңызды екенін атап өтті.
Мемлекет басшысы Қасым-Жомарт Тоқаев айқындаған әлеуметтік мәселелерге ерекше назар аударылды. 2024 жылы ел Президенті қауіпсіз және дені сау қоғам құру үшін бес өзекті мәселені атады: нашақорлық, лудомания, тұрмыстық зорлық-зомбылық, вандализм және ысырапшылдық. Бұл мәселелер де талқылаудың тақырыбына айналды және олардың шешілуі өңірдің одан әрі дамуы үшін маңызды деп танылды.
Сондай-ақ алаңдатарлық үрдіс – киберқылмыстардың көбеюі. Жиынға қатысушылар цифрлық кеңістіктегі азаматтардың қауіпсіздігіне алаңдаушылық білдіріп, интернет-қылмыстардың алдын алу жолдарын қарастырды.
«Таза Қазақстан» экологиялық жобасына ерекше назар аударылды. Экологиялық мәдениетті арттыру және мәселелерді шешу үшін мемлекеттік органдардың, партиялар мен халықтың күшін біріктіру қажеттігі айтылды.
Сонымен қатар, өңірді дамытуға, азаматтық қоғамды нығайтуға және халықтың әлеуметтік маңызы бар үдерістерге қатысуын ширата түсуге бағытталған жаңа бастамалар талқыланды.
Кездесу сындарлы сипатта өтіп, билік пен қоғам арасындағы диалогты нығайтудың кезекті қадамы болды.
