Зайсандағы өрт: әуеден 75 тоннадан астам су төгілді

Шығыс Қазақстан облысының Зайсан ауданында қамыс пен құрғақ шөптің жануынан алапат өрт шығып, дер кезінде толық сөндірілді. Тілсіз жау батпақты, өту қиын жерде тұтанып, шамамен 840 гектар аумақты шарпыды, деп хабарлайды F16.kz.

Осы орайда қызыл жалынмен арпалысқан құтқарушылардың еңбегін ерекше атап өткен жөн. Табиғаттың дүлей күшімен бетпе-бет келгенде, бірінші болып қауіптің ортасына аттанған өрт сөндірушілер мен тікұшақтағы экипаж мүшелері еді. Мамандар ештеңеден тайсалмай, бар күш-жігерін салды. Әуеден жердегі өртке су бүріккен тікұшақтардың әр қозғалысын дәлдік пен шеберліктің көрінісі дерсіз.

ТАҢҒЫ ДАБЫЛ

Kазспас жұмысы туралы нақты айта алмаймын, өйткені олардың неше рет су шашқанын немесе қалай жұмыс істегенін бақылаған жоқпын. Ал өзімізге келсек, өрт туралы хабар түннің бір уағында, бәлкім, таңға жуық берілген сияқты. Маған бұл ақпарат таңғы 5-те жетті, – деді Ми-8 МТВ тікұшағының екінші ұшқышы Максим Сизов.

Оның айтуынша, ұшуға шақырту алғаннан кейін жергілікті уақыт бойынша 8.30 шамасында оқиға орнына жеткен.

Біз барған кезде өрт аумағы шамамен 11 600 гектарды қамтып үлгеріпті. Бірден жағдайды бағамдап, бортта отырған мамандарға жағдайды көрсеттік. Сол жерде есептеу жүргізіп, өрттің нақты аумағын белгіледік. Бірнеше өрт ошағы болды. Біз бірден сөндіру жұмыстарына кірістік. Жердегі қызметтермен бірлесіп жұмыс істедік. Алғашқы жанармай құюға дейін 26 рет су төгіп үлгердік, – деді ол.

БІР КҮНДЕ БӘРІ АЯҚТАЛДЫ

Әрбір су төгудің орташа салмағы 2,5 тонна десек, өрт сөндіруге барлығы 75 тоннадан астам су қолданылған. Экипаж өкілі желдің бағыты қолайлы болғанын, бұл өрттің таралуына да, сонымен қатар сөндіру жұмыстарына да әсер еткенін атап өтті.

Жел өртті күшейткені рас, бірақ біз оны дұрыс пайдалана білдік. Бұған дейін де бірнеше рет ұшақ арқылы өрт сөндіру жұмыстарын жүргізген едік. Басты мақсатымыз – түске дейін өртті оқшаулап үлгеру еді, өйткені түстен кейін жел күшейіп, жалынды бақылау қиындауы мүмкін. Алға қойған мақсатымызға жеттік. Түске дейін қатты жұмыс істедік. Кейін тағы бір рет жанармай құйып, қалған ошақтарды сөндірдік. Егер қателеспесем, өртті сөндіру басшысы сол күні кешке локализация берді, яғни өрт аумағы толық бақылауға алынды. Қуаныштысы, бұл жолы да бір күннің ішінде жұмысымызды сәтті аяқтадық, – деп қорытындылады ол.

БОРТМЕХАНИК – КОМАНДИРДЫҢ «КӨЗІ МЕН ҚҰЛАҒЫ»

Төтенше жағдай болғандықтан, тікұшақ экипажы төрт адамнан құралды. Әдетте Ми-8 МТВ үлгісіндегі тікұшақтардың стандартты экипажы үш адамнан тұрады: командир, екінші ұшқыш және бортмеханик.

Алайда бұл жолы біз тапсырманың қиындығына байланысты төрт адам болып ұштық. Тікұшақ командирі Алексей Самарцев, бортмеханик инструктор Айдар Мамырханов және бортмеханик Дмитрий Серов. Экипаж құрамына қосымша бір бортмеханик алдық. Мұндай шешім жұмыстың нақты, үйлесімді және жедел орындалуы үшін қажет болды, – дейді экипаж мүшесі.

Бортта су төгетін құрылғы орнатылған. Бұл құрылғымен жұмыс істеу үшін екі бортмеханик қажет: біреуі кабинада қалып, командирге бағыт-бағдар беріп отырады, ал екіншісі су төгу жұмысына тікелей жауапты.

Командир су жинау кезінде тікұшақпен қалықтап тұрған сәтте астындағыны көрмейді, тек экипаж мүшелерінің көмегіне сүйенеді. Бұл жерде бортмеханик – командирдің «көзі мен құлағы». Ол дауыс арқылы метрлеп, сантиметрлеп бағыт беріп, командирдің іс-әрекетін басқарады, – деп түсіндірді ұшу тобының мүшесі.

ҚАТТЫ ЖЕЛ КЕДЕРГІ БОЛДЫ

Осындай үйлесімді жұмыс пен тәжірибенің арқасында өрт сөндіру операциясы табысты аяқталды. Өрттің елді мекендерге таралу қаупі болмады, адам өміріне қауіп төнген жоқ.

Өртпен күреске 400-ден астам адам мен 70 техника, оның ішінде төтенше жағдайлар департаменті мен жергілікті атқарушы органдардың күші жұмылдырылды.

Желдің күші кей жерлерде 20 м/с дейін жетіп, өртті ауыздықтауға едәуір кедергі келтірді. Жердегі әрекеттерден бөлек, Ми-8 тікұшақтары арқылы әуеден сөндіру шаралары жүргізіліп, өрт толықтай сағат 19.30-да сөндірілді.

Айжанат Бақытқызы

Фото: ШҚО өңірлік коммуникациялар қызметі

Ctrl

Enter

Қатені көрсеңіз

Мәтінді белгілеп Ctrl+Enterбасыңыз

Пікірлер (0)

Мы в

Ұнады 0

Ұнамады 0