ШҚО үздік үштікте: өңірде мемлекеттік-жекеменшік серіктестік нығайып келеді

Шығыс Қазақстанда мемлекеттік-жекеменшік серіктестік шеңберінде жүзеге асып жатқан жобалардың дені білім саласына қатысты, деп хабарлайды F16 тілшісі.

Бұл туралы бүгін облыс әкімдігінде Парламент Сенатының Қаржы және бюджет комитеті депутаттарының қатысуымен өткен мемлекеттік-жекеменшік серіктестікті дамыту мәселелеріне арналған дөңгелек үстел отырысында белгілі болды.

Сенат депутаттары, Ұлттық экономика министрлігінің басшылығы, «Атамекен» Ұлттық кәсіпкерлік палатасы мен жергілікті бизнес-қауымдастық өкілдері қатысқан жиынға облыс әкімі Нұрымбет Сақтағанов төрағалық етті.

Белгілі болғандай, Шығыс Қазақстанда мемлекеттік-жекеменшік серіктестік шеңберінде жүзеге асып жатқан жоба аз емес. Қазіргі уақытта облыста жалпы құны 12,2 миллиард теңгенің 47 мемлекеттік-жекеменшік серіктестік шарты жасалды. Оның басым бөлігі білім саласына қатысты жобалар. Дәлірек айтсақ, 4,3 миллиард теңгенің 44 шарты жасалған. Қалған үш жоба дене шынықтыру және спорт (құны 7,8 миллиард теңге), көлік (24,6 миллион теңгеге) пен денсаулық сақтау (16,7 миллион теңге) салаларына тиесілі. Осы ретте жасалған шарттардың 87 пайызы мемлекеттік міндеттемелерді төлеуді талап етпейтін 3 санаттағы жобалар екенін айтқан жөн.

Мемлекеттік-жекеменшік серіктестік аясында қолға алынған жобалардың үлесі бойынша Шығыс Қазақстан облысы елімізде үздік үштіктің қатарында. Дегенмен, сіздердің облыстарыңыздағы жобалардың түгелдей дерлігі білім, денсаулық сақтау мен денешынықтыру және спорт сияқты салаларды қамтиды. Енді басқа бағыттарда да жұмыс жүргізу қажет. Мәселен, облыста туризм, өнеркәсіп, ауылшаруашылығы сынды салалардың әлеуеті өте жоғары. Жалпы, республикамызда 2017-2021 жылдар аралығында мемлекеттік-жекеменшік серіктестік бағыты қарқынды дамығанын білесіздер. Алайда, соңғы төрт жылда бұл жұмыс бәсеңдеп қалды. Неге? Бүгінгі басқосуда осы мәселені де жан-жақты талқыладық, – деді Сенат депутаты Нұрлан Бекенов.

Ал Бекболат Орынбековтың айтуынша, елімізде мемлекеттік-жекеменшік серіктестік қарқынының бәсеңдеп қалуына заң шикілігі де әсерін тигізуде. Сенат депутаты қолданыстағы заң жобалары кәсіпкерлер үшін түсініксіз екенін айтты. Сол себепті, көп жағдайда бизнес-қауымдастық мұндай жобаларға қатысудан бас тартып жатады.

Алқалы жиын барысында қатысушылар осы және басқа да мәселелерге қатысты пікір білдіріп, ұсыныстарын жеткізді. Ал облыс әкімі Нұрымбет Сақтағанов Парламент депутаттары мен жергілікті бизнес қауымдастық көтерген мәселелер орынды екенін және тығырықтан шығу үшін заңнамаға өзгеріс енгізу қажет екенін айтты.

Кешелі бері біздің облысымыздағы мемлекеттік-жекеменшік серіктестік шеңберінде жүзеге асырылып жатқан жобалармен танысып жүрсіздер. Сын-ескертпелеріңіз де бар екен. Оның бәрі ескерілетін болады. Негізі, біз диалогқа ашықпыз. Инвесторлармен жұмыс істеуге, оларға жағдай жасауға дайынбыз. Ал бүгінгі жиында көтерілген мәселелер мен айтылған ұсыныстарды Үкіметке жеткізесіздер деп ойлаймын, – деді облыс әкімі.

Нұржан Кенжеұлы

Фото: ШҚО әкімінің баспасөз қызметі

Ctrl

Enter

Қатені көрсеңіз

Мәтінді белгілеп Ctrl+Enterбасыңыз

Пікірлер (0)

Мы в

Ұнады 0

Ұнамады 0