Өлім-жітім көбейді, науқастар дәлізде жатыр: Өскемендегі аурухананың жағдайы

Ел ішінде «бірінші қалалық аурухана» аталған Өскемендегі Шығыс Қазақстан облыстық мамандандырылған медициналық орталығында науқастар дәлізде жатыр. Қолқаны қапқан күлімсі иіс бүкіл аурухананы алып кеткен. Сасық иіс төбедегі жылдар бойы жиналған құстардың саңғырығынан келіп тұр. Былтырдан бері жөндеу жүргізіліп жатқан денсаулық сақтау мекемесінде F16.kz тілшісі болып қайтты.

ЖОСПАРДАН ТЫС ТЕКСЕРУ

Өңірдегі іргелі аурухананың бірінен саналатын медицина орталығына кеше Шығыс Қазақстан облысы әкімінің бірінші орынбасары Жақсылық Омар жоспардан тыс барды. Ондағы негізгі себеп – кейінгі кезде тұрғындар тарапынан арыз-шағымның тым көбейіп кетуі. Әсіресе, дәрігерлердің дөрекі іс-әрекеті мен салғырттығына шағымданған жұрт әлеуметтік желілерде бәрін ашық жазып жатыр. Ресми ақпаратқа сенсек, кейінгі екі-үш жылда өлім-жітім де көбейген.

Адам өліміне әкелген жағдайлар жылдан-жылға көбейіп барады. Мәселен, 2023 жылы ол 3,9 пайыз болса, 2024 жылы 4 пайызға жетті. Ал биылғы алғашқы тоқсанда өлім-жітім деңгейі 4,5 пайыз болды. Бұл – жағымсыз үрдіс. Мұнымен күресу керек, – деді Жақсылық Омар.

ДӨРЕКІ ДӘРІГЕР, ЕСІНЕН ТАНҒАН НАУҚАС

Қоғамның наразылығын туғызған тағы бір жәйт – дәрігерлердің қарым-қатынасы.

Әлеуметтік желілерге жүргізілген мониторинг нәтижесін және тұрғындар жазған арыз-шағымдарды зерделей келе біз бұл мекемеде мәселе көп екенін байқаймыз. Тұрғындар медицина қызметкерлерінің дөрекі әрекетіне, сондай-ақ диагностика (ауруды анықтау – ред.) кезіндегі қателіктерге жиі шағым айтады. Тіпті жедел жәрдеммен жеткізілген адамды қабылдамай сағаттап күттіріп қойған, ол аздай науқастың қасындағы жақындарына дәрігерлерге көмектесіп жіберуді өтінген жағдайлар болған екен. Тағы бір жағдайда науқас есінен танып қалғаннан кейін барып көрсетіліпті. Бұл не сұмдық?! – деді облыс әкімінің бірінші орынбасары.

ЖӨНДЕУ ЖҰМЫСЫ ДҰРЫС ЖОСПАРЛАНБАҒАН

Былтыр облыстық мамандандырылған медициналық орталықта жөндеу жұмыстары басталған. Содан бері маза жоқ. Кейбір науқастар орын таппай қаз-қатар тізіліп дәлізде жатыр. Гүрсілдеген, тарсылдаған дыбыстар, шаң-тозаң төсек тартқан емделушіні қойып сау адамның жүйкесін жұқартады. Жұрттың ашуын туғызған да осы жағдай.

Бюджеттен ақша бөлінгенін, ғимаратта жөндеу жүргізілетінін білдіңіздер. Демек жұмысты алдын ала жоспарлау керек болған. Қай блок, қай бөлме, қашан жөнделетінін ескеріп, соған қарай науқастарды жатқызатын орынды ыңғайласаңыздар мынандай жүйесіздік болмас еді. Сіздердің қазіргі іс-әрекетке қарап науқастарды емдеуге емес, жөндеуге бөлінген қаражатты игеруге тырысып жатқандай көрінеді, – деп түйді Жақсылық Омар.

Сондай-ақ облыс әкімінің бірінші орынбасары 23 мамырда өтетін медицина алқасында осы “бірінші қалалық аурухананың” мәселесін талқылауды ұсынды.

ҚОЛҚАНЫ ҚАПҚАН ЖАҒЫМСЫЗ ИІС

Жөндеу жүргізіліп жатқан аурухананың төбесінде жылдар бойы кептердің саңғырығы жиналған және оны бұған дейін ешкім тазаламаған. Құс саңғырығының қолқаны қапқан жағымсыз иісі ғимараттың бірнеше қабатына түгел тарап, онсыз да әрең жатқан науқастардың тынысын тарылтты. Жақсылық Омар тез арада шатырды тазалауда тапсырды.

Фото: F16.kz

Ctrl

Enter

Қатені көрсеңіз

Мәтінді белгілеп Ctrl+Enterбасыңыз

Пікірлер (0)

Мы в

Ұнады 0

Ұнамады 0