Қауіпті инфекция: ШҚО-да көкжөтел жиілеген бе?
Шығыс Қазақстанда балалар арасында көкжөтел жиілей бастаған көрінеді.
Облыс аумағында көкжөтелдің расталған 23 жағдайы тіркеліпті, деп хабарлайды F16.kz сайты.
ШҚО санитарлық-эпидемиологиялық бақылау департаментінің мәліметіне сүйенсек, науқастардың көбі - 14 жасқа дейінгі балалар. Оның ішінде: 1 жасқа дейін - 3 бала, 5 жасқа дейін - 19 бала. Олардың барлығы Өскемен қаласының тұрғындары екен.
Санитарлық-эпидемиологиялық бақылау департаменті басшысының орынбасары Сәуле Слямғазинаның айтуынша, диагноз қойылған балалар өзіндік себептермен вакцинацияланбаған: екпе алатын жасқа толмаған немесе ата-аналары бас тартқан, т.с.с.
Өткен жылы 14 жасқа дейінгі балалар арасында көкжөтелдің үш жағдайы ғана тіркелген: Өскемен қаласы мен Күршім ауданында. Олар да вакцина алмағандар қатарынан екен. Демек, биыл көкжөтел жиілеп барады деп айтуға толық негіз бар.
Фото: doct.ru
