Күршімде агроөнеркәсіп саласын алға оздыратын жобалар қолға алынды

Күршім ауданында ауыл шаруашылығын дамытуға бағытталған ауқымды жобалар қолға алынып жатыр, деп хабарлайды F16.kz.

Шығыс Қазақстан облысының Күршім ауданында егістік алқаптарының көлемін ұлғайту және ауыл шаруашылығын әртараптандыру жұмыстары жүйелі түрде жүзеге асырылып жатыр. Бұл бастама – Мемлекет басшысы Қасым-Жомарт Тоқаевтың ауыл шаруашылығы өнімдерін 2024–2028 жылдар аралығында екі есеге арттыру жөніндегі тапсырмасына сәйкес қолға алынған маңызды жобалардың бірі.

Президенттің тапсырмасын орындау мақсатында аудан көлемінде тиімді жер пайдалануды қамтамасыз ету, ауыл шаруашылығы саласына инвестиция тарту және заманауи технологияларды енгізу бағытында нақты шаралар қабылдануда. Соның нәтижесінде жергілікті инвесторлар мен кәсіпкерлер туған жерлеріне оралып, агроөнеркәсіп кешенін дамытуға белсене атсалысып жатыр.

Осындай іскер азаматтардың бірі – Күршім өңірінің тумасы, көп жыл бойы әскери салада қызмет еткен Қайыргелді Зарыпханұлы. Қазіргі таңда ол Өскемен қаласындағы «Шығыс май» компаниясының директоры қызметін атқарып жүр. Елге оралған соң туған топыраққа ту тігіп, ауыл шаруашылығы саласына инвестиция құюға шешім қабылдаған. Оның бастамасымен Күршім ауданындағы Маралды ауылының маңынан жер телімі беріліп, оған егін егілмек.

Елге келіп, инвестиция салып, техника әкеліп, жер жыртып, егін екпекпіз. Келешекте құрама жем және май зауыттарын салсақ деген жоспарымыз бар. Бұл жобалар жергілікті тұрғындар үшін жаңа жұмыс орындарын ашуға мүмкіндік береді. Жаңадан алынған техникаларды ауыл адамдары басқарып, заманауи аграрлық тәжірибе жинайды, – деді Қайыргелді Зарыпханұлы.

Аудан әкімдігінің мәліметінше, қазір өңірде жалпы көлемі 26 мың гектар егістік жер бар. Бұған қосымша 10 мың гектардай босалқы жерлер бар, олар болашақта айналымға енгізілмек.

Ауыл шаруашылығы саласындағы бастамаларды жүзеге асыру үшін аудан әкімдігі «Шығыс май» компаниясымен бірлесіп жұмыс істеуге көшті. Көктемгі егіс науқаны қарқынды басталып, жаңа ауыл шаруашылығы техникалары жеткізілді.

Бос жатқан жерлерді бірлескен шаруа қожалықтары арқылы игере бастадық. Жаңа техника күшімен егіс көлемін ұлғайту – ауыл шаруашылығының тиімділігін арттырып, өңір экономикасына серпін береді, – деді Күршім ауданы әкімінің орынбасары Алмас Ижимов.

Аудан басшылығы мен кәсіпкерлердің тығыз серіктестігі арқасында Күршімде ауыл шаруашылығы дами түсті. Қайыргелді Зарыпханұлы сияқты туған жердің дамуына үлес қосып жүрген азаматтардың бастамасы еліміздің аграрлық әлеуетін арттыруға айтарлықтай үлес қосатыны сөзсіз.

Фото: Күршім ауданы әкімдігі

Ctrl

Enter

Қатені көрсеңіз

Мәтінді белгілеп Ctrl+Enterбасыңыз

Пікірлер (0)

Мы в

Ұнады 0

Ұнамады 0