Өскеменде джиу-джитсуден халықаралық турнир өтті
Өскеменде тұңғыш рет джиу-джитсуден Халық қаһарманы Қасым Қайсеновты еске алуға арналған халықаралық турнир жалауын желбіретті, деп хабарлайды F16 тілшісі.
Өскемен қалалық денешынықтыру, спорт және туризм бөлімінің қолдауымен, сондай-ақ Шығыс Қазақстан облыстық джиу-джитсу федерациясының ұйымдастыруымен өткен жарыстың мақсаты – өскелең ұрпақ арасында салауатты өмір салтын насихаттау, джиу-джитсудің танымалдылығын арттыру. Бұл туралы жарыстың ұйымдастыру комитетінің мүшесі Дамир Төкеннен білдік.
– Соңғы жылдары елімізде джиу-джитсу мен грепплинг жекпе-жектерінің танымалдылығы айтарлықтай артты. Біздің облыс та да солай. Осыны ескере келе, Өскеменде Батыр атамыз Қасым Қайсеновтың мемориалын өткізуді жөн санадық. Бұл турнирді жыл сайын мамыр айында өткізіп тұруды жоспарлап отырмыз. Біздің бастамамызға қолдау білдірген ел ағаларына алғыс айтамыз, – дейді Д.Төкен.
Белгілі болғандай, биылғы турнирге төрт елдің спортшылары, барлығы 32 джитсер қатысты. Дәлірек айтсақ, жарыста қазақстандық файтерлерден бөлек, Бразилия, Өзбекстан мен Тәжікстаннан келген спортшылар сынға түсті. Олардың жас ерекшеліктері мен атақ-дәрежелері де әртүрлі, арасында аталмыш спортқа енді қадам басқан бес жастағы балақайлардан бастап, ересек жастағы кәсіпқой джитсерлерге дейін бар.
Бір айта кетерлігі, жарыс жаңаша форматта ұйымдастырылыпты. Яғни, жас ерекшелектеріне қарай бөлінген 16 жұп өзара мықтыны анықтап, арнайы тағайындалған белбеулерді сарапқа салады.
Борис Александров атындағы Спорт сарайында өткен турнир есігі кез келген адам үшін ашық болды. Осы ретте бұл күні танымалдылығы уақыт өткен сайын артып келе жатқан джиу-джитсу жекпе-жектерін тамашалауға бірталай халық жиналғанын айту керек.
– Болашақ чемпиондарды даярлауда мұндай жарыстардың орны бөлек. Себебі, дәл осындай халықаралық турнирлерге қатысу арқылы тәжірибе жинап, шеберлікті шыңдауға болады. Бұл әсіресе жас спортшылар үшін аса маңызды. Жалпы, соңғы жылдары біздің джитсерлер ауыз толтырып айтарлықтай нәтижелер көрсетіп, Әлемде үздіктер қатарынан ойып тұрып орын алды. Жоғары жетістікке жетіп жүрген қазақстандықтардың арасында біздің жерлестер де аз емес, – дейді Д.Төкен.
Айта кетейік, бұл жолғы жарысқа қатысушылардың арасында Өскемендегі Қасым Қайсенов атындағы джиу-джитсу мен грепплинг академиясының бірнеше тәрбиеленушісі де болды. Соңғы жылдары республикалық қана емес, халықаралық додаларда үздіктер қатарынан көрініп жүрген академия тәрбиеленушілерінің саны жылдан жылға артып келе жатқаны қуантады. Дәл қазіргі уақытта онда 300-ге жуық джитсер жаттығады екен.
Нұржан Кенжеұлы
