Бос жұмыс орындар жәрмеңкесіне 2 мыңнан астам студент қатысты – ШҚО

Бүгін Өскеменде жұмыссыз азаматтар, білім беру ұйымдарының түлектері мен жұмыс берушілер бір алаңда бас қосты. «Шығыс маманы» деп аталатын бос жұмыс орындар жәрмеңкесіне 2 мыңнан астам адам қатысып, түрлі мекемелермен тілекей байланыс орнатты, деп хабарлайды F16.kz тілшісі.

Ұлттық статистика бюросының мәліметіне сүйенсек, 2024 жылдың төртінші тоқсанында елімізде жұмыссыздар саны 448,2 адам болған. Бұл 2023 жылдың сәйкес кезеңімен салыстырғанда 0,5%-ға көп. Finprom басылымының ақпараты бойынша, адамдардың дені жұмыссыздық себебін лайықты қызмет таба алмағаннан деп көрсеткен.

Шығыс Қазақстанда жұмыссыздық мәселесін шешу мақсатында бос жұмыс орындар жәрмеңкесі жиі өткізіліп тұрады. Тәжірибесі жоқ жас мамандар үшін бұл таптырмас мүмкіндік.

Бұл жолы жәрмеңкеге аудандар мен қалалардан 113 жұмыс беруші 2 мыңнан астам бос жұмыс орнын ұсынды. Жергілікті оқу орындарынан 2300-ге жуық студент келіп қатысып жатыр. Түлектер диплом алғаннан кейін бірден жұмысқа орналасып, алыс аудандарға барып жұмыс іздемеу үшін барлығын бір алаңда жинадық. Қазір облыста мұғалім, дәрігер, медбике, құрылысшы мамандықтарына сұраныс артқанын байқап отырмыз. Бұл жастардың мамандықпен жұмысқа орналасуына жақсы мүмкіндік деп ойлаймын, - деді Мансап орталығының директоры Арайлым Есімбекова.

Марқакөл ауданы әкімдігінің өкілдері де «Шығыс маманы» жәрмеңкесіне арнайы келген. Олар мемлекеттік қызметке қызығушылық білдірген жас мамандарды жаңа ауданға шақырды.

Қазір бізде дербес бөлімдерде, әкім аппаратында, әлеуметтік жұмыспен айналысатын 28 бос жұмыс орны бар. Қызығушылық білдіргендер айтарлықтай көп деп айта алмаймыз, бірақ келіп жатыр. Ауылда жұмыс істеуге ниетті жастарға қазір мүмкіндік көп. «Дипломмен ауылға» бағдарламасы арқылы баспана сатып алуға немесе салуға несие және көтерме жәрдемақы беріледі, - деді Марқакөл ауданы әкімі аппараты жалпы бөлімінің басшысы Әсем Болысова.

Студенттер қатарында ауылдық жерге барып, туған елге еңбек еткісі келетіндер де бар. Олардың бірі - С.Аманжолов атындағы ШҚУ студенті Гүлім Тілеубергенова.

Өзім Күршім ауданының тумасымын. Бірақ баспанамен қамтамасыз ететін болса кез келген ауданға баруға дайынмын. Еңбек жолын ауылда бастау, үйреніп, тәжірибе жинауға жақсы мүмкіндік деп ойлаймын, - деді ол.

Фото: F16.kz

Ctrl

Enter

Қатені көрсеңіз

Мәтінді белгілеп Ctrl+Enterбасыңыз

Пікірлер (0)

Мы в

Ұнады 0

Ұнамады 0