Шымкентте университет басшылығы жымқырған ақшаға коттедж бен қымбат көліктер сатып алған

Шымкенттің жоғары оқу орындарының бірінде ірі көлемде ақша жымқыру фактісі анықталды, деп хабарлайды F16.kz.

ҚАНДАЙ АЙЫП ТАҒЫЛДЫ?

Қаржылық мониторинг агенттігінің баспасөз қызметі таратқан ақпаратқа сүйенсек, күдіктілер қатарында ректордың міндетін атқарушы, қаржы және әкімшілік департаменттерінің директоры, сондай-ақ жоғары оқу орнының мердігерлік ұйымдарының басшылары бар. Оларға 256 млн теңге көлемінде бюджет қаражатын жымқырды деген айып тағылды.

Қаржылық мониторинг агенттігінің Шымкент қаласы бойынша департаменті М.Әуезов атындағы Оңтүстік Қазақстан университетінде аса ірі мөлшерде бюджет қаражатын ұрлау және қылмыстық жолмен өндірілген мүлікті жария ету фактісі бойынша тергеуді аяқтады, - деп жазылған хабарламада.

ҚАРАЖАТТЫ ҚАЛАЙ ЖЫМҚЫРДЫ?

Тергеу нәтижесінде университет қызмет көрсету, құрылыс-монтаж жұмыстарын орындау және тауар жеткізуге қатысты жалпы сомасы 256 млн теңгеге жалған келісімшарттар жасағаны анықталды. Бірақ бұл жұмыстар іс жүзінде жүргізілмеген, бюджет қаражаты жалған актілер негізінде серіктес мердігерлік ұйымдардың шоттарына аударылып, кейін қолма-қол ақша түрінде шешіп алынған.

АҚШАНЫ ҚАЙДА ЖҰМСАДЫ?

Күдіктілер қылмыстық жолмен иеленген қаражатқа алты қымбат автокөлік (Мерседес бенц S-класс, Lexus LX570 және т.б.) және Шымкент қаласының орталығында жалпы құны 254 млн теңге болатын элиталық коттедж сатып алған. Олар соттың санкциясы бойынша қамауға алынды, - делінген хабарламада.

Төрт күдіктіге қатысты үйқамақ түріндегі бұлтартпау шарасы таңдалды. Қылмыстық іс сотқа жіберілді.

Фото: ҚР ҚМА

Ctrl

Enter

Қатені көрсеңіз

Мәтінді белгілеп Ctrl+Enterбасыңыз

Пікірлер (0)

Мы в

Ұнады 0

Ұнамады 0