ШҚО құтқарушыларына 65 жаңа техника берілді

Бүгін Өскеменнің орталық алаңында Шығыс Қазақстан облысының төтенше жағдайлар қызметкерлеріне жаңа техникалар мен қызметтік пәтерлердің кілті табыс етілді. Салтанатты шараға төтенше жағдайлар министрі Шыңғыс Әрінов пен аймақ басшысы Нұрымбет Сақтағанов қатысты, деп хабарлайды F16.kz тілшісі.

Облыстық төтенше жағдайлар қызметінің автопаркі 65 сужаңа техникамен толықты. Олардың ішінде өрт сөндіретін және жол талғамайтын машиналар, сондай-ақ жедел-құтқару, суда жүзу көліктері бар.

Мұндай техникалардың біз үшін маңызды екенін күнделікті өмірде, тәжірибеде көріп жүрміз. Осы техникалар мен қызметкерлердің арқасында жұмыстың тиімділігі артып отыр. Төтенше жағдайлар министрлігінің автопаркін жаңарту – тұрғындарды қорғау мен қызметті дамытудағы стратегияның бір бағыты. Заманауи техникалардың көмегімен қыс кезінде тұрғындардың қауіпсіздігі қамтамасыз етілді. Бүгін – гарнизон үшін маңызды күн. Бұл техникалар төтенше жағдай кезінде жылдам әрі тиімді әрекет етуге мүмкіндік береді, – деді министр Шыңғыс Әрінов.

Бұл күні құтқарушылар жаңа техникалармен қатар қызметтік пәтерлерге, ведомстволық наградалар мен алғыс хаттарға ие болды.

Өңірдің азаматтық қорғау саласының материалдық-техникалық базасын нығайтуға кейінгі екі жылда 4 миллиардтан астам теңге қаражат бөлінгенін атап өткен облыс әкімі Нұрымбет Сақтағанов табиғи және техногендік апаттардың алдын алып, салдарын жоюда төтенше жағдай қызметінің рөлі жоғары екенін айтты.

Президент Қасым-Жомарт Тоқаев төтенше жағдайлар қызметіне ерекше көңіл бөледі. Себебі, сіздер халықтың қауіпсіздігі мен мүлкін қорғау, елдегі табиғи және техногендік апаттардың алдын алу және жою бағытында үлкен жұмыстар атқарасыздар. Біз депутаттық корпуспен бірлесіп жергілікті азаматтық қорғау органдарының материалдық-техникалық базасын нығайтуға күш саламыз. Соңғы екі жылда бұл бағытта 4 миллиардтан астам теңге қаражат бөлінді. Жұмысты ары қарай жалғастыра береміз. Бүгін міне жаңа қызметтік автокөліктер, құрал-жабдықтар беріліп отыр. Бұл техникалар жұмыс тиімділігін арттыруға септігін тигізеді деп сенеміз, – деді облыс әкімі.

Ведомство басшысына облыстың көктемгі су тасқынына дайындығы туралы ақпарат беріліп, өңірлік бөлімше қызметінде цифрлық технологияларды қолданудың сәтті үлгісі көрсетілді. Қазір төрт бағыт бойынша деректер бір ақпараттық жүйеге жиналады: су тасқыны қаупі бар елді мекендер, гидропосттардан алынған ақпарат, жоспарлы инженерлік-техникалық жұмыстар, су тасқынына қарсы іс-шаралар.

Осындай жүйе арқылы жедел штаб су тасқыны қауіпі бар аймақтарды, қандай гидротехникалық құрылымдарды, арналарды және көпірлерді тазарту қажет екенін, қай елді мекендерге су тасқыны қаупі төніп тұрғанын нақты біледі.

Болашақта бұл жүйеге өзендердің су деңгейі туралы ақпарат енгізу көзделген. Бұл су тасқынының алдын алуға, жағалауды бекіту және арналарды тазарту жұмыстарын тиімді жоспарлауға мүмкіндік береді.

Фото: F16.kz

Ctrl

Enter

Қатені көрсеңіз

Мәтінді белгілеп Ctrl+Enterбасыңыз

Пікірлер (0)

Мы в

Ұнады 0

Ұнамады 0