«Жолымызды талқандады»: Катонқарағай халқы дабыл қақты
Шығыс Қазақстан облысының Катонқарағай ауданы аумағында жүк көліктері Өскемен-Катонқарағай-Рахман қайнары республикалық жолының тас талқанын шығарды. Трассаның қазіргі жағдайын видеоға, фотосуретке түсірген тұрғындар F16.kz редакциясына хат жолдап, дабыл қақты.
МӘСЕЛЕНІҢ МӘН-ЖАЙЫ
Жергілікті жұрттың айтуынша, биыл көктемде Катонқарағай ауданының Белқарағай ауылы маңында әуежай құрылысы басталған. Содан бері әуе айлағын салып жатқан компанияның 40 тонналық алып жүк көліктері арылы-берілі ағылып, сайрап жатқан тақтайдай асфальт жолдың түгін қоймай бүлдірген. Бұл жағдай тұрғындардың ашуын туғызды. Әлеуметтік желілерде асфальті қопарылып, ойылған жолдың фото-видеолары тарап, қызу талқыға түсті. Желі қолданушылары: “Қаншама жыл тұрған жолдың тас талқанын шығарыпты”, “Аэропорт салып біткенше жол да бітеді”, “Ес білгелі мұндай болмаған біз жақта”, “Әуежай саламыз деп тас жолды талқандады”, “Иә, бізде солай, бірдеңені жасау үшін басқаны бүлдіреді, мынадай машиналарға жанама жол жасау керек еді, енді жолды жөндегенге ақшаны қайдан алады?» деген ауанда пікірлерін жазып жатыр.
ЖОЛ ДА, ӘУЕЖАЙ ДА БОЛАДЫ
Шығыс Қазақстан облысының жолаушылар көлігі және автомобиль жолдары басқармасының басшысы Нұржан Жұмаділов бұл мәселені білетінін, туристік маусым басталғанға дейін жол қалпына келтірілетінін айтты.
ЗАМАНАУИ ҰШАҚТАРДЫ ҚАБЫЛДАЙДЫ
Президент Қасым-Жомарт ТоқаевЗайсан және Катонқарағай аудандарының курорттық аймақтарында жаңа әуежай салу жөнінде тапсырма берген. Жуықта еліміздің көлік министрі Марат Қарабаев пен облыс әкімі Нұрымбет Сақтағанов екі әуежайдың құрылысы ресми түрде басталғанын мәлімдеді.
Қатонқарағай әуежайына Белқарағай ауылы маңынан 266 гектар жер бөлінген. Жоба аясында болашақта кеңейту мүмкіндігі бар 2,2 мың метрлік ұшу-қону жолағы қарастырылған. Әуе айлағы Bombardier Q400, ATR-72 және басқа да заманауи ұшақтарды қабылдай алады.
Сонымен қатар мұнда төрт әуе кемесіне арналған перрон, 4 мың шаршы метрлік заманауи аэровокзал, командалық-диспетчерлік пункт, апаттық-құтқару қызметі, метеостанция және радионавигациялық жабдықтар қарастырылған.
Фото: F16.kz/видеодан алынған кадр
