ШҚО-да бес теміржол вокзалы жаңартылады
Биылғы 14 сәуірде елімізде 125 теміржол вокзалы және оларға іргелес аумақтарды жаңарту жөніндегі ауқымды бағдарлама ресми түрде басталды. Жобаның негізгі мақсаты – вокзал инфрақұрылымын заманауи талаптарға сай қалыпқа келтіру, жолаушыларға жайлы жағдай жасау және көліктің қолжетімді болуын қамтамасыз ету. Жөндеу жұмыстары биылғы 25 қазанға дейін аяқталуға тиіс, деп хабарлайды F16.kz.
ТАҢДАУ ТҮСКЕН БЕСЕУ
Шығыс Қазақстан облысында бұл бағдарлама аясында бес вокзал жаңғыртылады. Олардың қатарында облыс орталығының негізгі көлік нысаны – «Өскемен-1» вокзалы, сондай-ақ туристік бағыттар үшін маңызды «Алтай», «Күмістау», «Риддер» және «Шемонаиха» вокзалдары бар.
Жөндеу және қайта жаңарту жұмыстарын уақтылы әрі сапалы орындау үшін «Қазақстан теміржолы» ұлттық компаниясы тәжірибесі мол және қажетті ресурстармен қамтамасыз етілген мердігерлік ұйымдарды тартты.
Өңірдің бас шаһарындағы «Өскемен-1» вокзалына ерекше көңіл бөлініп отыр. Облыс орталығының келбеті саналатын бұл нысан тәулігіне мыңнан астам жолаушыға қызмет көрсетеді. Вокзал салынған уақыттан бері күрделі жөндеу жүргізілмеген. Жаңғырту нәтижесінде ғимарат заманауи талапқа сай болады, күту залы кеңейтіледі, конкорстық өткел салынып, жаяу жүргіншілер көпірі жөнделеді.
Сонымен қатар мүгедектігі бар азаматтарға арналған қызметтер елеулі түрде жақсарып, қолайлы жағдай туғызу сапасы арта түседі.
ӨЗГЕРІС ҚАЙ САЛАЛАРҒА ӘСЕР ЕТЕДІ?
Бүгінгі таңда Шығыс Қазақстан облысында тұрақты түрде алты жолаушылар пойызы қатынайды. Олар: 351/352 – Алматы-2 – Өскемен-1, 67/68 – Астана – Өскемен-1, 641/642 – Өскемен-1 – Алтай, 6983/6984 – Өскемен-1 – Риддер, 407/408 – Риддер – Новосібір, 459/460 – Өскемен-1 – Жалаңашкөл (жазғы кезеңде).
Өңірдегі жолаушылар ағынының көлемі жылына 360 мыңнан астам адамға жетіп отыр. Шығыс Қазақстан аумағында қатынайтын жолаушылар пойызы облыстық бюджет есебінен субсидияланады. Бөлінетін субсидия көлемі жылына – 470 млн теңге.
Бұл өзгерістер өңір тұрғындары мен қонақтарының теміржол қызметтеріне қолжетімділігін арттырып, жалпы көлік инфрақұрылымының сапасына оң әсер етпек. Бұдан бөлек әлеуметтік жағдайдың жақсаруына және облыстағы туризм саласының дамуына да ықпал етеді.
Фото: ШҚО өңірлік коммуникациялар қызметі
