БҰҰ миссиясына қатысқан өскемендік жауынгерлер елге оралды

БҰҰ-ның Бақылау және қадағалау күштері (UNDOF) миссиясы аясында Голан жоталарында бір жыл бойы қызмет атқарған Қазақстанның алғашқы бітімгерлік контингенті елге оралды. Олардың қатарында Өскемен гарнизонының 27943 әскери бөлімінен бес жауынгер бар, деп хабарлайды F16.kz.

Қазақстаннан аттанған 139 жауынгерден жасақталған бітімгерлік рота өзіне жүктелген міндеттерді абыроймен атқарды. Сарбаздар өздеріне бекітілген аймақта патрульдік қызмет атқарып, жүктерді жеткізу кезінде қауіпсіздікті қамтамасыз етті, сондай-ақ тұрғындарға гуманитарлық көмек көрсетуге белсенді қатысты.

Бір жыл ішінде қазақстандық контингент 600-ден астам тапсырманы орындады. Атап айтқанда, төрт эвакуациялық операция жүргізіп, 400-ден астам жарылмаған оқ-дәріні жойды. Бұл – бейбітшілік пен тұрақтылықты сақтауға қосылған маңызды үлес. Жерлестеріміздің осындай халықаралық миссияға қатысып, елге абыроймен оралуы – үлкен мақтаныш. Олар жоғары тәртіп пен кәсіби шеберліктің үлгісін көрсетті. Бұл – болашақ офицерлер мен сарбаздар үшін зор өнеге. Біз олардың ерлігін лайықты бағалап, әскери қызметтің абыройлы жолын жалғастыра береміз, – деді 27943 әскери бөлімінің штаб бастығы, полковник Ерденбек Ахметов.

Бітімгерлік миссия – еліміздің Қарулы Күштері үшін жаңа тәжірибе ғана емес, сонымен қатар Қазақстанның халықаралық аренадағы беделін арттыруға бағытталған маңызды қадам. Елге оралған сарбаздарды туған-туыстары мен әскери басшылық зор қуанышпен қарсы алды.

Қазақстандық бітімгерлердің бұл алғашқы тәжірибесі болашақта халықаралық миссияларға қатысуға сенімді негіз болары сөзсіз.

Фото: ШҚО Қорғаныс істері жөніндегі департаменті

Ctrl

Enter

Қатені көрсеңіз

Мәтінді белгілеп Ctrl+Enterбасыңыз

Пікірлер (0)

Мы в

Ұнады 0

Ұнамады 0