Әрбір оқу орнына полиция қызметкері бекітілді – ШҚО

Мемлекет басшысының «Заң мен тәртіп» қағидатын іске асыру мақсатында ішкі істер министрі Ержан Сәденов 2025 жылды қылмысқа қарсы профилактика жылы деп жариялады. Осы орайда құқық қорғау органдары қылмыстың алдын алу шараларын күшейтіп, қоғамдағы қауіпсіздікті қамтамасыз етуге, заң бұзушылықтардың алдын алуға баса назар аударылып отыр, деп хабарлайды F16.kz тілшісі.

КӨШЕДЕГІ БҰЗАҚЫЛЫҚҚА ТОСҚАУЫЛ

Кәмелетке толмағандардың құқығын қорғау, әкімшілік және қылмыстық құқық бұзушылықтарды анықтау, қоғамдық орындарда және көшелерде болатын бұзақылықтың алдын алу мақсатында биылғы 10 сәуір мен 6 мамыр аралығында облыс аумағында республикалық «Жасөспірім» жедел-алдын алу іс-шарасы өтіп жатыр.

Алдын алу шарасына жергілікті атқарушы органдар, прокуратура, білім беру, денсаулық сақтау саласының өкілдері тартылды. Сондай-ақ бұл жұмыстар кәмелетке толмағандардың істері және олардың құқығын қорғау туралы комиссиямен тығыз қарым-қатынаста жүргізіледі, - деп атап өтті ШҚО ПД жергілікті полиция қызметі басқармасының ювеналды полицияның ерекше тапсырмалар жөніндегі аға инспекторы, полиция майоры Әйгерім Бейсенбаева.

ҚАНША ЖАСӨСПІРІМ ЖАУАПҚА ТАРТЫЛДЫ?

Полиция департаментінің бұйрығымен әрбір оқу орнына аумақтық полиция бөлімінің басшылары бекітіліп, ювеналдық полиция қызметкерлері, учаскелік инспекторлары және криминалдық полицияның жедел уәкілдері жауапты ретінде бекітілген. Олар кәмелетке толмағандар жасаған қылмыстар мен құқық бұзушылық профилактикасы бойынша жұмыстар жүргізеді.

Өңірдегі жасөспірімдер арасындағы заңбұзушылық деңгейі көңіл көншітпей тұр. Дегенмен құқық қорғау органдарының мәліметінше, тәртіп бұзатындар саны жылдан-жылға азайып келе жатыр. Мәселен, былтырғы 4 айда 956 жасөспірім жауапкершілікке тартылса, биыл ол 638-ге төмендеген.

Бұл жүргізіліп жатқан алдын алу жұмыстардың оң нәтижесі деп айта аламын. Әкімшілік құқық бұзушылықтан бөлек, ата-аналық міндетін тиісті деңгейде орындамайтындарың саны биыл едәуір азайғаны қуантады. Ол баланың өзін-өзі ұстауына, мінез-құлқына әсер етеді, - дейді Әйгерім Бейсенбаева.

500-ГЕ ТАРТА АТА-АНА ЕСЕПКЕ АЛЫНДЫ

«Жасөспірім» жедел-алдын алу шарасы басталғалы полиция бөлімдеріне кәмелетке толмаған 473 жасөспірім жеткізіліп, 479 әкімшілік құқық бұзушылық анықталған. Сондай-ақ 27 жасөспірім мен 27 қолайсыз отбасы есепке алынды.

Біз жасөспірімдердің қатысуымен болатын жол-көлік оқиғаларының алдын алуға да назар аудардық. Сондықтан оқу орындарына іргелес аумақтарда жол қауіпсіздігін талдау нәтижесі бойынша 36 ұсыным жолданды. Комиссияның отырысында 119 материал қаралып, онда 51 материалды сотқа жолдау туралы шешім шығарылды. Сот қаулысының негізінде 11 жасөспірім арнайы білім беру мекемелеріне жолданды, 19 заңды өкіл ата-аналық құқығынан айырылды, үш ата-ананың құқықтарына шектеу қойылды, - деп атап өтті аға инспектор.

Бүгінде облыс бойынша 199 кәмелетке толмаған жасөспірім және бала тәрбиесі бойынша міндеттерін орындамайтын 490 ата-ана есепке алынған.

Фото: F16.kz/жасанды интеллект

Ctrl

Enter

Қатені көрсеңіз

Мәтінді белгілеп Ctrl+Enterбасыңыз

Пікірлер (0)

Мы в

Ұнады 0

Ұнамады 0