WorldSkills Shygys 2025 чемпионаты басталды

Бүгін Шығыстың бас шаһарында дәстүрлі WorldSkills Shygys 2025 чемпионаты басталды, деп хабарлайды F16.kz тілшісі.

Мемлекет басшысы Қасым-Жомарт Тоқаевтың Жарлығымен 2025 жыл Жұмысшы мамандықтар жылы болып жарияланды. Осы бастаманы жүзеге асыру мақсатында өңірде түрлі іс-шаралар, жобалар мен бағдарламаларды жүзеге асыру жоспарланған. Сондай шаралардың бірі - WorldSkills Shygys 2025 чемпионаты. Аймақтағы кәсіпорындарымен бірлесіп ұйымдастырылатын кәсіби шеберлік чемпионатына колледж студенттері, түлектері және жұмыс істейтін жастар қатысады.

WorldSkills Shygys чемпионаты жылда ұйымдастырылады. Алғаш рет 2016 жылы алты құзыреттілік бойынша өткен. Бүгінде қатысушылар 38 құзыреттілік бойынша сынға түсіп жатыр. Жетістіктеріміз де жоқ емес, республикалық чемпионатта жеңіске жетіп, әлемдік додаларда ел намысын қорғаған жерлестеріміз де бар. Бұл жердегі басты мақсат – колледждегі білім сапасын және студенттердің біліктілігін арттырып, мықты маман тәрбиелеп шығару, - деді ШҚО әкімінің орынбасары Ербол Нұрғалиев.

Облыстық білім басқармасы басшысының орынбасары Алима Ақылбектің айтуынша, биыл чемпионатқа сегіз колледждің базасында 170-тен астам студент қатысып отыр. Қатысушылардың жұмысын кәсіпорындардың жетекші мамандары, колледждердің өндірістік оқыту шеберлері мен тәлімгерлері бағалайды.

Бұл чемпионатқа қатысу арқылы жастар ұлттық кәсіби шеберлік байқауларында тәжірибелерін кеңейтуге және оқыту технологиялары мен халықаралық деңгейдегі жаңа кәсіби стандарттармен танысуға мүмкіндік алады.

Мұндай көлемді чемпионатқа алғаш рет қатысып отырмыз. Бірақ қобалжу жоқ, өзіме сенімдімін деп айта аламын. Себебі колледжде іс-тәжірибеден өту барысында түрлі техникалардың тілін меңгергенбіз. Биыл көлік жүргізу куәлігін алдық. Егін науқаны кезінде егістік алқаптарына барып трактор жүргізіп те көрдік. Байқауда осыған дейін үйренгенімізді іс жүзінде көрсетеміз. Оқуымды аяқтағаннан кейін өз ауданыма барып, осы салада жұмыс істеуді жоспарлап отырмын, - деді Шығыс Қазақстан көпсалалы колледжінің студенті Бағдат Икарбек.

Айта кету керек, аймақтық жеңімпаздар қарашада Астанада өтетін WorldSkills Kazakhstan 2025 республикалық чемпионатында облыс намысын қорғайды.

Ctrl

Enter

Қатені көрсеңіз

Мәтінді белгілеп Ctrl+Enterбасыңыз

Пікірлер (0)

Мы в

Ұнады 0

Ұнамады 0