Қанас пен Марқакөл: трансшекаралық туризмнің жаңа парағы ашыла ма?

Қытайдың Шыңжан-Ұйғыр автономиялық ауданына сапары аясында ШҚО әкімі Нұрымбет Сақтағанов ШҰАА партия комитетінің хатшысы Ма Синжуймен және ШҰАА Халық үкіметінің төрағасы Еркін Тұниязбен кездесті, деп хабарлайды F16.kz.

Бұл туралы Шығыс Қазақстан облысы әкімінің баспасөз қызметі мәлім етті. Ресми ақпаратқа сүйенсек, кездесуде екі өңір арасындағы ынтымақтастықтың негізгі бағыттары талқыланған.

Қазақстан Президенті Қасым-Жомарт Тоқаев 2024 жылды Қытайдағы Қазақстан туризмі жылы деп жариялауына орай біз трансшекаралық Қанас көлі (ҚХР) – Марқакөл көлі – Катонқарағай ауылы туристік бағытын бірлесіп жүзеге асыруды ұсынамыз. Бұл бағыт екі өңірдің табиғи көрікті жерлерін, оның ішінде Қытайдағы ең танымал жеті туристік орынның бірі Қанас көлін және Қазақ Алтайының інжу-маржаны Марқакөл көлін біріктірмек, – деді Нұрымбет Сақтағанов.

Өңірдегі туристік аймақтарға электр желісін тарту, сапалы жол салу, инфрақұрылымды толық жүргізу, қонақүйлер салу бойынша қарқынды жұмыс жүргізіліп жатыр.

Қытай тарапынан Шығыстың табиғаты мен этномәдени мұрасына қызығушылық жоғары екенін ескеріп, бірнеше бағытта көлік қатынасын қамтамасыз ету көзделген. Атап айтқанда, Шығыс Қазақстан облысы Үрімжі-Өскемен тікелей халықаралық әуе рейсін, сондай-ақ Қанас-Катонқарағай, Қанас-Зайсан бағыттарын ашу мәселесін қарастыру ұсынылды.

Облыс әкімі атап өткендей, туризмнен басқа да өзара тиімді ынтымақтастық орнатуға болатын көптеген сала бар. Олар: өнеркәсіп, автомобиль және арнайы техника өндіру, ағаш өңдеу, су энергетикасы және ауыл шаруашылығы.

Әуе қатынасын ашу мен шекаралық өткізу бекетін іске қосу бастамаларын жүзеге асыру өңірлер арасындағы туризмді, облыс экономикасының басым бағыты ретінде дамытуға қуатты серпін беріп, Қазақстан мен Қытай арасындағы достық пен әріптестіктің символына айналар еді, – деді ШҚО әкімі.

Оның айтуынша, қос тараптың бірлескен күш-жігері арқылы шекаралас өңірлердің өркендеуіне бағытталған нақты іс жүзіндегі ынтымақтастықтың жаңа парағын ашуға болады.

Өз кезегінде Қытай тарапы өзара тиімді ынтымақтастыққа қызығушылық танытып, тізе қосып жұмыс істеуге дайын екендіктерін білдірді.

Бұл сапар ынтымақтастықты нығайта түседі деп сенеміз. Сіздердің ұсыныстарды қолдаймыз және бұл бастамалар өңіріміздің дамуына оң әсерін тигізеді деп сенеміз. Екі тарап арасындағы алмасуды күшейтіп, қажет болса Шығыс Қазақстанда экономикалық және сауда ынтымақтастығы жөніндегі жұмыс тобының отырысын өткізуді ұсынамыз, – деді ШҰАА партия комитетінің хатшысы Ма Синжуй.

Сонымен қатар ол білім беру, мәдениет және трансшекаралық туризм салаларында Шығыс Қазақстанмен ынтымақтастықты жалғастыруға ниет білдірді.

Фото: ШҚО әкімінің баспасөз қызметі

Ctrl

Enter

Қатені көрсеңіз

Мәтінді белгілеп Ctrl+Enterбасыңыз

Пікірлер (0)

Мы в

Ұнады 0

Ұнамады 0